116
Okwebalya oMusengwa
1 Ntaka oMusengwa, olwʼokubba awulira eigono lyange,
nʼokwegairira kwange.
2 Olwʼokubba antegera ekitwi,
namusabanga omu kiseera kyʼobwomi bwange bwonabwona.
3 Akabbikabbi akʼokufa kabbaire kaneeruguuliriirye,
entiisya yʼe magombe nʼeneesibaku,
ni mba omu bugosi nʼenima.
4 Awo ni nsaba oMusengwa nti,
“Oo Musengwa, onnunule!”
5 OMusengwa wʼekisa era mutuukirirye,
oKibbumba waiswe musaasiri.
6 OMusengwa akuuma abatayezya kwerwanaku,
owenabbaire mpoiremu eisuubi, yannunwire.
7 Mwoyo gwange, oiremu okubba mugumu,
olwʼokubba oMusengwa abbairenge musa egyendi.
8 OMusengwa andamirye okufa,
nʼansangula amaliga.
Andamirye okugwa
9 kaisi ntambulirenge omumaiso ga Musengwa,
omu kyalo kyʼaboomi.
10 Naikiririirye omu Kibbumba, waire nga natumwire nti,
“Ngadire ino!”
11 Natiire ni nkoba nti,
“Nabuli muntu mubbeyi!”
12 Kintuki ekinasasula oMusengwa
olwʼebisa ebyankoleire?
13 Nasiirya ekikopo kyʼobununuli
ni mpuuja eriina lya Musengwa.
14 Natuukiriryanga obweyamo bwange eeri oMusengwa,
omumaiso gʼabantube bonabona.
15 Nga kirumya ino oMusengwa,
omoiza oku batuukiriryebe owaafa!
16 Oo Musengwa, mazima ndi muweereryawo;
ndi muweereryawo, ngʼomama oweyabbaire.
Onnunwire omu kufa.
17 Nakuwanga esadaaka eyʼokwebalya,
era ni nkusaba, Musengwa.
18 Natuukiriryanga obweyamo bwange eeri oMusengwa,
omumaiso gʼabantube bonabona,
19 omu luuga lwʼenyumbaye,
aakati omu Yerusaalemi.
Muwuuje oMusengwa!