115
OKibbumba ali moiza yenkani owʼamazima
1 Oo Musengwa, iswe titusaanira ekitiisya,
iswe titukisaanira, wazira niiwe okisaanira,
olwʼokutakakwo okutakoma nʼobwesigwabwo.
2 Lwaki abanamawanga babuulya bati,
“OKibbumba waabwe ali yaina?”
3 OKibbumba waiswe abba mwigulu,
era akola nabuli kyataka.
4 Neye ebifaananyi ebyʼokusinza ebyʼabakibbumba baabwe byʼefeeza na zaabbu,
abantu ebibeekolera na ngalo.
5 Biri nʼeminwa, neye tibitumula,
biri nʼamaiso, neye tibibona.
6 Biri nʼamatwi, neye tibiwulira,
biri nʼamanindo, neye tibifunyirya.
7 Biri nʼengalo, neye tibikwata ekintu,
biri nʼebigere, neye tibitambula. Era amamiro gaabyo tigazwamu eigono.
8 Abo ababikola basuuka ooti niibyo,
era bonabona ababyesiga babba ooti niibyo.
9 Inywe abʼenyumba ya Isirairi, mwesigenge Musengwa,
niiye ababbeera era niiye engabo yaanywe.
10 Inywe abʼenyumba yʼAlooni, mwesigenge Musengwa,
niiye ababbeera era niiye engabo yaanywe.
11 Inywe abatya oMusengwa, mumwesigenge,
niiye ababbeera era niiye engabo yaanywe.
12 OMusengwa atwebukirya, era atuwa enkabi.
Yaawa abʼenyumba ya Isirairi enkabi,
Yaawa abʼenyumba yʼAlooni enkabi.
13 Yaawa enkabi abamutya,
abatobato nʼabakulu.
14 OMusengwa aganye mweyongere obungi,
inywe nʼabaana baanywe.
15 Oleke oMusengwa abawenge enkabi,
Iye eyakolere eigulu nʼekyalo.
16 Eigulu iryo lya Musengwa,
neye ekyalo yakiwaire bantu.
17 Abafu tiniibo abawuuja oMusengwa,
abo abaikirira e magombe awasiriki.
18 Neye iswe aboomi niiswe abagulumalya oMusengwa,
atyanu nʼemirembe gyonagyona.
Muwuuje oMusengwa.