118
Okwebalya oMusengwa olwʼobuwanguli
1 Mwebalyenge oMusengwa, olwʼokubba musa;
okutakakwe okutakoma kubbeerererawo emirembe gyonagyona.
2 Oleke aBaisirairi bakobe bati,
“Okutakakwe okutakoma kubbeerererawo emirembe gyonagyona.”
3 Oleke abʼenyumba yʼAlooni bakobe bati,
“Okutakakwe okutakoma kubbeerererawo emirembe gyonagyona.”
4 Oleke abo abatya oMusengwa bakobe bati,
“Okutakakwe okutakoma kubbeerererawo emirembe gyonagyona.”
5 Owenabbaire omu bugosi neekungiriire oMusengwa,
nʼanjiramu era nʼannunula.
6 OMusengwa ali nanze, tinaatyenge.
Omuntu ayezya kunkola niki?
7 OMusengwa ali nanze, era niiye omubbeeri wange.
Nalibona ngʼawangula abalabe bange.
8 Kisa kwirukira eeri Musengwa okukukuuma,
okukiraku okwesiga abantu.
9 Kisa kwirukira eeri Musengwa okukukuuma,
okukiraku okwesiga abakungu.
10 ABanamawanga bonabona banzingizire,
neye omu liina lya Musengwa, bonabona ni mbasaanyawo.
11 Banzingizire ku buli lubba,
neye omu liina lya Musengwa, ni mbasaanyawo.
12 Banjoolookeireku ni banzingiza ooti nzoki,
neye bawoirewo mangu mangu ngʼomusyo ogwʼomu mawa owegulikira;
omu liina lya Musengwa, nabasaanyirewo.
13 Bannumbire nʼamaani, katono bampangule,
neye oMusengwa nʼambeera.
14 OMusengwa niiye ampa amaani era niiye olwembo lwange;
niiye annunula.
15 Owulire okubbookooka okwʼeisangaalo era okwʼobuwanguli
omu weema gyʼabatuukirirye, okuti,
“Engalo endiiro eya Musengwa ekolere ebyamaani.
16 Engalo endiiro eya Musengwa bagigulumalye ino,
Engalo endiiro eya Musengwa ekolere ebyamaani.”
17 Nze tinaafe neye naabba mwomi,
era nnangirire oMusengwa ebyakolere.
18 OMusengwa ambonerezere ino,
neye tampaireyo eeri okufa.
19 Munjigulirewo egeeti egingira omu kifo ekitukulye;
nnyingire neebalye oMusengwa.
20 Enu niiyo egeeti eingira e wa Musengwa,
abatuukirirye omu baingirira.
21 Nakwebalyanga Musengwa, olwʼokubba wairiremu okusaba kwange,
nʼosuuka mununuli wange.
22 Eibbaale abombeki eribagaine
lisuukire niiryo erisiba ensonda.
23 Ekyo oMusengwa niiye eyakikolere,
era ni tukibona ni tukyewunya.
24 Lunu niirwo olunaku oMusengwa olwakolere,
oleke tusangaale, era tulujagaaniremu.
25 Oo Musengwa tukwegairiire otununule;
oo Musengwa, ebitukola obiwe enkabi.
26 Wʼenkabi iye oyo aiza omu liina lya Musengwa.
Tubasabira enkabi nga tuli omu nyumba ya Musengwa.
27 OMusengwa niiye oKibbumba,
era agira ekitangaalakye ni kitwakira.
Mukwate esadaaka
mugisibire oku maziga gʼekyoto nʼemiguwa.
28 Iwe niiwe oKibbumba wange, era nakwebalyanga.
Iwe niiwe oKibbumba wange, era nakugulumalyanga.
29 Mwebalyenge oMusengwa, olwʼokubba musa;
okutakakwe okutakoma kubbeerererawo emirembe gyonagyona.