119
Amateeka ga Musengwa
1 Bʼenkabi abali omu bwomi obunambulaku ekyokubunenya,
abo abakolera oku mateeka ga Musengwa.
2 Bʼenkabi abo abagondera ebiragirobye,
ibo abamunoonia
nʼemyoyo gyabwe gyonagyona.
3 Ibo abo tibakola kibbikibbi,
neye batambula ngʼoMusengwa obwataka.
4 Musengwa, watutekeirewo amateekago,
nʼotulagira tugagonderenge nʼobwesigwa.
5 Kale singa ngumiire
omu kukwata amateekago!
6 Tinankubbaire nswala,
singa mbaire ngondera ebiragirobyo.
7 Nakuwuujanga nʼomwoyo omulongoole,
nga wenjega okugondera amateekago amatuukirirye.
8 Nagonderanga amateekago,
nkwegairiire tiwandekesulira nakimo.
Okugondera aMateeka ga Musengwa
9 Omuvuvuka yakuumanga atya amanzirage ni gabba malongoole?
Ngʼatambula ngʼobwotaka.
10 Nkunoonia nʼomwoyo gwange gwonagwona,
tiwandeka ni ncaama okuzwa oku mateekago.
11 Nkuumire ebiragirobyo omu mwoyo gwange,
kaisi tinakola ekibbikibbi omumaisogo.
12 Oo Musengwa nkuwuuja
onjegesye amateekago.
13 Nkolesya omunwa gwange ni nnangirira
amateekago gonagona agewatuwaire.
14 Nsangaalira omu kugondera ebiragirobyo,
ooti muntu asangaalira ebyobusuni ebingi.
15 Nfumintiriza oku mateekago,
era ni nseega oku biragirobyo.
16 Nsangaalira okugondera amateekago;
tineerabirenge ekibonokyo.
AMateeka ga Musengwa galeeta eisangaalo
17 Onkolerenge nze omuweereryawo ebintu ebisa,
kaisi mmbenge mwomi era ngonderenge ebiragirobyo.
18 Olibulye amaiso gange mpezye okubona
ebyewuunyisya ebiri omu mateekago.
19 Oku kyalo ndi mugeni,
tiwambisa ebiragirobyo.
20 Omwoyo gwange gukandiire ino
okumanya amateekago gonagona.
21 Onenya abeekudumbalya, ibo abalaame
era ibo abajeemera ebiwalagiire.
22 Ontooleku ebizumi nʼokujolonga
olwʼokubba ngondera ebiragirobyo.
23 Era abafugi batyama ni bantumulaku ebibbibibbi,
neye nze omuweereryawo, nfumintiriza ku mateekago.
24 Ebiragirobyo niibyo eisangaalo lyange,
era niimwo omunsuna amalabuki.
Okumalirira okukwata aMateeka ga Musengwa
25 Ndi ku mugo gwʼamagombe,
onjiryemu obwomi ngʼobwewasuubizire.
26 Nakubbutuliire byonabyona ebinakolere, nʼonjiramu;
onjegesye amateekago.
27 Ombeere okutegeera amateekago,
awo kaisi nfumintirizenge ku bikolebyo ebyewunyisya.
28 Omwoyo gwange guncemuka olwʼenima
onjiryemu amaani ngʼobwewasuubizire.
29 Onkuume tinatambulira omu manzira amacaamu,
era olwʼekisaakyo, onjegesye amateekago.
30 Nsalirewo okubba mwesigwa,
nteekere omwoyo ku mateekago.
31 Nkolera ino ku biragirobyo,
oo Musengwa, tiwandeka ni nswala.
32 Nakoleranga ku biragirobyo,
olwʼokubba ombeera okubitegeera nakusani.
Okusaba okutegeera aMateeka
33 Oo Musengwa onjegesye okukwata amateekago,
era nagakwatanga bulijo.
34 Ombeere okugategeera, era nagakwatanga
ni ngagondera nʼomwoyo gwange gwonagwona.
35 Ombeere okugonderanga ebiragirobyo,
olwʼokubba mwibyo mu nsagaalira.
36 Ocuuse omwoyo gwange gugonderange ebiragirobyo,
okukiraku okweiniranga byʼobusuni.
37 Ocuuse amaiso gange gazwe oku bintu ebitagasa,
era okuume obwomi bwange ngʼobwewasuubizire.
38 Otuukirirye ekiwasuubizire omuweereryawo,
awo kaisi bakuwe ekitiisya.
39 Ontoleku ebizumi ebyentya,
olwʼokubba ennamulayo nsa.
40 Obone, ntaka ino amateekago,
okuume obwomi bwange, olwʼokubba iwe oli mutuukirirye.
Okwesiga aMateeka ga Musengwa
41 Oo Musengwa, oleke okutakakwo okutakoma kubbe nanze,
era onnunule ngʼobwewasuubizire;
42 awo kaisi mbeeku nʼekinjiramu abanzuma,
olwʼokubba neesiga kibonokyo.
43 Tiwaganya ebibono ebyʼamazima ni bimpwamu,
olwʼokubba nteekere eisuubi lyange mu mateekago.
44 Nakwatanga amateekago bulijo,
emirembe nʼemirembe.
45 Era naabbanga mwidembe,
olwʼokubba neefudaku okukwata amateekago.
46 Natumulanga oku biragirobyo, omumaiso gʼabakabaka,
era tinaswalenge,
47 olwʼokubba nsangaalira amateekago,
era ngataka ino.
48 Mpa ebiragirobyo ekitiisya era mbitaka;
era nafumintirizanga oku mateekago.
Okugondera aMateeka kuleeta eisuubi
49 Oyebukirye ekiwansuubizire, nze omuweereryawo,
olwʼokubba kimpa eisuubi.
50 Nʼomu kugada njiramu amaani,
olwʼokubba ekisuubizokyo kikuuma obwomi bwange.
51 Abeekudumbalya bansekerera ino,
neye tinalekenge amateekago.
52 Oweneebukirya amateeka agewatuwaire eira,
Musengwa, njiramu amaani.
53 Ekiruyi kinkwata owembona ababbibabbi
nga bazwa oku mateekago.
54 Amateekago niigo agennyembaku,
ngʼomusenze nabuli awemba.
55 Obwire nkwebukirya Musengwa,
era ni nfumintiriza oku mateekago.
56 Nsunire enkabi,
olwʼokubba ngondera ebiragirobyo.
Okumalira omwoyo oku Mateeka ga Musengwa
57 Oo Musengwa, niiwe omugabo gwange,
nsuubiza okugonderanga ebiragirobyo.
58 Nkwegairira nʼomwoyo gwange gwonagwona obbe musa egyendi,
onkwatire ekisa ngʼobwewasuubizire.
59 Owenningirira engeri egineebityamu,
ncuuka ni nsengererya ebiragirobyo.
60 Tingayaala, nnyanguwa
okukwata amateekago.
61 Ababbibabbi nʼowebantega entuula,
tineerabira amateekago.
62 Omu kiire aakati ndamuka okukwebalya,
olwʼamateekago amatuukirirye.
63 Ndi mukaagwa wa bonabona abakutya,
era ndi mukaagwa wa bonabona abakwata amateekago.
64 Oo Musengwa, ekyalo kiizwire kutakakwo okutakoma,
onjegesye amateekago.
Omugaso gwʼokukwata aMateeka
65 Okoleire omuweereryawo ebisa,
ngʼobwewasuubizire.
66 Ompe amalabuki nʼokutegeera,
olwʼokubba nkwata amateekago.
67 Owenabbaire nga bakaali okumbonereza nacaamanga,
neye atyanu ngondera ekibonokyo.
68 Oli musa, era ebyokola bisa,
onjegesye amateekago.
69 Newankubbaire ngʼabeekudumbalya bantumulaku ebyobubbeyi,
neye nze ngondera ebiragirobyo nʼomwoyo gwange gwonagwona.
70 Emyoyo gyabwe giizwire biseego ebibbibibbi,
neye nasangaalanga olwʼamateekago.
71 Okumbonereza kwangasire,
olwʼokubba kwanzwereireku okwega amateekago.
72 Amateeka agewatuwaire gankiriraku
enkumi nʼenkumi gyʼamairambula gʼezaabbu nʼefeeza.
AMateeka ga Musengwa matuuce
73 Wambumbire nʼengalogyo, era niiwe owankolere,
ombeere okutegeera kaisi njege amateekago.
74 Oleke abakutya owebambonanga bajaagaanenge,
olwʼokubba nteekere eisuubi lyange mu kibonokyo.
75 Oo Musengwa, mmaite nti olamula mu butuuce,
era wambonerezere olwʼokubba oli mwesigwa.
76 Oganye okutakakwo okutakoma kunjiryengemu amaani,
ngʼobwewansuubizire nze omuweereryawo.
77 Oganye ekisaakyo kimbeeku kaisi mbe mwomi,
olwʼokubba amateekago niigo eisangaalo lyange.
78 Oleke abeekudumbalya baswale olwʼokunsibiriryaku;
neye nze nafumintirizanga ku biragirobyo.
79 Oleke abo abakutya baize egyendi,
kaisi bayezye okumanya amateekago.
80 Onganye nkwatenge kusani amateekago,
kaisi tinaswalanga.
Okusaba okukutoola omu kabbikabbi
81 Oo Musengwa mpulira nfa nga njoya okunnunula,
neye nteekere eisuubi lyange mu kibonokyo.
82 Amaiso gandoolere olwʼokukuumirira ekiwasuubizire;
ni neebuulya nti, “Walinjiryamu di amaani?”
83 Waire nga nsuukire kinambulamu era ekintu ekitagasa,
neye tineerabira amateekago.
84 Nze omuweereryawo naguminkiriza kutuuca di?
Walibonereza di abanjiigaania?
85 Abeekudumbalya bankuuliire ebiina mbigwemu,
ibo abatakwata amateekago.
86 Amateekago gonagona meesigwa.
Banjiigaania anambula nsonga, ombeere.
87 Babbaire bali kumpi kunsaanyawo oku kyalo,
neye tinazwire oku mateekago.
88 Olwʼokutakakwo okutakoma okuume obwomi bwange,
kaisi ngonderenge ebiragirobyo.
Okugumira oku Mateeka ga Musengwa
89 Oo Musengwa, ekibonokyo kibbeerererawo,
era omwigulu kibbaayo nga kinyweze.
90 Obwesigwabwo bubbeerererawo emirembe gyonagyona,
wagumiirye ekyalo omu kifo kyakyo ni kibbeerererawo.
91 Ebintu byonabyona bikaali biriwo ngʼobwewalagiire,
olwʼokubba byonabyona biweererya niiwe.
92 Singa amateekago tigabbaire isangaalo lyange,
nga nafiire owenabbeereire omu kugada.
93 Tineerabirenge ebiragirobyo,
olwʼokubba mwibyo mwokuumiire obwomi bwange.
94 Ndi wuwo; onnunule,
olwʼokubba neefudaku okutuukirirya ebiragirobyo.
95 Ababbibabbi bagonerera kunjita,
neye nze naseeganga ku mateekago.
96 Mboine ebintu byonabyona bikoma,
neye amateekago tigakoma.
Okutaka aMateeka ga Musengwa
97 Oo, nga ntaka ino amateekago,
ngafumintirizaku okumalaku olunaku.
98 Amateekago gansuuca wʼamalabuki okukiraku abalabe bange,
olwʼokubba niigo agannuŋamya nabuli kiseera.
99 Ndi nʼokutegeera okukiraku abansomesya bonabona,
olwʼokubba nfumintiriza ku biragirobyo.
100 Ndi wʼamalabuki okukiraku abakaire,
olwʼokubba nkwata amateekago.
101 Nkuumire ebigere byange okutatambulira omu nzira yonayona eyʼababbibabbi,
kaisi ngonderenge ekibonokyo.
102 Tinzwanga oku mateekago,
olwʼokubba iwe onyere onjegesya.
103 Ebibonobyo nga bimpoomera ino,
bimpoomera ino okukiraku omujenene.
104 Okubita omu mateekago nsuna obulabuki,
nʼolwekyo ni ncaawa entambula yonayona embiibbi.
AMateeka ga Musengwa gammoleekerera ooti itaala
105 Ekibonokyo niikyo eitaala erimmoleekerera nga ntambula,
era ekitangaala omu nzira yange.
106 Ndayira era neeyama
okukwatanga amateekago amatuukirirye.
107 Oo Musengwa, ngadire ino;
okuume obwomi bwange ngʼobwewasuubizire.
108 Oo Musengwa, osiime okuwuuja okwempaayo omu kutaka nga nkwebalya,
era onjegesye amateekago.
109 Obwomi bwange bubba mu kabbikabbi nabuli kaseera,
neye tineerabira amateekago.
110 Ababbibabbi bantegere omutego,
neye tinzwire oku biragirobyo.
111 Ebiragirobyo niibyo ebyobusika byange ebyʼemirembe gyonagyona;
niibyo ebisangaalisya omwoyo gwange.
112 Mmaliriire okutuukiriryanga ebiragirobyo,
paka owenalifa.
AMateeka ga Musengwa niigo agankuuma
113 Ncaawa abʼemyoyo emibiri,
neye ntaka amateekago.
114 Niiwe ekiirukiro kyange era engabo yange;
nteekere eisuubi lyange mu kibonokyo.
115 Muzwewo e gyendi inywe abakola ebibbibibbi,
kaisi nkwate amateeka ga Kibbumba.
116 Ongumye ngʼobwewasuubizire, kaisi mbe mwomi,
tiwandeka ni nswala ate nga nkusuubirira mu niiwe.
117 Ompanirire kaisi mbe omu mweyaayo,
era nagonderanga ebiragirobyo bulijo.
118 Iwe ocaawa bonabona abazwa oku biragirobyo,
olwʼokubba olugezigezi lwabwe kinambulamu.
119 Ababbibabbi bonabona oku kyalo obabitya ooti bisasiro,
ekyo kinzweraku okutaka ebiragirobyo.
120 Ntukuta olwʼokukutya;
mbuninkirira olwʼamateekago.
Okuwulira aMateeka ga Musengwa
121 Nkolere ebyobutuukirirye nʼebyobwenkanya;
tiwandekesula eeri abalabe bange.
122 Osuubize okunkolera nze omuweereryawo ebisa;
tiwaganya abeekudumbalya okunjolonga.
123 Amaiso gandoolere nga nkuumiriire okunnunula,
nga nkumiriire ekisuubizokyo iwe omwenkanya.
124 Ombitye nze omuweereryawo ngʼokutakakwo okutakoma obwekuli,
era onjegesye amateekago.
125 Ndi muweereryawo, ompe okutegeera,
kaisi ntegeere ebiragirobyo.
126 Oo Musengwa, niikyo ekiseera okubbaaku nʼekyokola,
olwʼokubba abantu ababbibabbi bamenya amateekago.
127 Nze ntaka amateekago okukiraku ezaabbu,
okukiraku ezaabbu iyo ennongoole.
128 Era olwʼokubba ngondera ebiragirobyo byonabyona,
ncaawa entambula yonayona embiibbi.
Okwegomba okugondera aMateeka ga Musengwa
129 Ebiragirobyo byewuunyisya,
nʼolwekyo mbigondera.
130 Ebibonobyo owebabisonzola, biwa ekitangaala,
biwa amalabuki abo abagadamba.
131 Njasama omunwa ni neekombakomba,
olwʼokuyoya eino amateekago.
132 Ondoleku era onkwatire ekisa,
nga bulijo obwokwatira abo abakutaka.
133 Olungamyenge entambula yange ngʼowewasuubizire,
era tiwaganya ekibbikibbi kyonakyona ni kinfuga.
134 Onnunule eeri abo abangadya,
kaisi njezye okukwata amateekago.
135 Ondoleku nze omuweereryawo nʼeriiso eryʼekisa,
era onjegesye amateekago.
136 Amaliga gakulumuka omu maiso gange ooti maizi,
olwʼokubba abantu tibakwata mateekago.
AMateeka ga Musengwa ga bwenkanya
137 Oo Musengwa, oli mutuukirirye,
era amateekago gʼobwenkanya.
138 Ebiragirobyo ebiwateekerewo bituuce,
era byesigwa nakimo.
139 Ekiruyi kinduma ino,
olwʼokubba abalabe bange beerabiire ebibonobyo.
140 Ebisuubizobyo bikengeize,
era nze omuweereryawo mbitaka.
141 Waire nga ndi muyejere era bannyooma,
neye tineerabira amateekago.
142 Obutuukiriryebwo bubbeerererawo,
era amateekago matuuce.
143 Ndi omu kugada nʼokuluga okunene,
neye amateekago niigo eisangaalo lyange.
144 Ebiragirobyo bituuce emirembe gyonagyona;
ompe okutegeera kaisi mbe mwomi.
Okusaba oMusengwa okutulamya
145 Oo Musengwa, nkusaba nʼomwoyo gwange gwonagwona; onjiremu,
era nakwatanga amateekago.
146 Nkusaba onnunule,
era nagonderanga ebiragirobyo.
147 Mpuuna ngʼemambya ekaali okusala ni nkwekungirira okumbeera;
nteekere eisuubi lyange mu kibonokyo.
148 Mbonia ekiire okuca,
nga nfumintiriza oku bisuubizobyo.
149 Owulire okwekunga kwange olwʼokutakakwo okutakoma;
oo Musengwa olwʼobwenkanyabwo okuume obwomi bwange.
150 Abo abansalira enkwe baigereire,
cooka ibo tibakwata amateekago.
151 Neye iwe Musengwa ondi kumpi,
era amateekago gonagona matuuce.
152 Eira nayegere ebiragirobyo,
ni mmanya nti wabiteekerewo kubbeerererawo emirembe gyonagyona.
Okusaba okusuna obubbeeri
153 Obone okugada kwange, onnunule,
olwʼokubba tineerabiranga amateekago.
154 Ondwanirire era onnunule;
okuume obwomi bwange ngʼobwewasuubizire.
155 Ababbibabbi babba yala nʼokubanunula,
olwʼokubba tibagondera ebiragirobyo.
156 Oo Musengwa ekisaakyo kingi,
olwʼobwenkanyabwo okuume obwomi bwange.
157 Abalabe bange nʼabanjiigaania bangi,
neye nze tinzwire oku biragirobyo.
158 Owembona abʼenkwe mbazuzuula,
olwʼokubba tibakwata ebiragirobyo.
159 Oo Musengwa obone ngʼowentaka amateekago;
okuume obwomi bwange olwʼokutakakwo okutakoma.
160 Omulamwa gwʼamateekago mazima meereere;
amateekago gonagona amatuukirirye gʼemirembe gyonagyona.
Okutaka eino aMateeka ga Musengwa
161 Abafugi banjiigaania anambula nsonga,
neye nze ebiragirobyo mbiwa ekitiisya.
162 Nsangaalira mu bisuubizobyo,
ooti muntu asangaalira omunyago omungi.
163 Ncaawa era neesinya obubbeyi,
neye ntaka amateekago.
164 Nkuwuuja mirundi musanvu nabuli lunaku,
olwʼobutuukirirye bwa mateekago.
165 Bali nʼeidembe eryʼamaani abo abataka amateekago,
era mpaawo ekibeesitaalisya.
166 Oo Musengwa, nkuumirira niiwe okunnunula,
era ntuukirirya amateekago.
167 Ngondera ebiragirobyo
era mbitaka ino.
168 Nkwata amateekago ni ngondera nʼebiragirobyo,
era obona byonabyona ebinkola.
Okusaba oMusengwa obubbeeri
169 Oo Musengwa, oganye okwekunga kwange kutuuke egyoli;
ompe okutegeera ngʼobwewasuubizire.
170 Owulire okwegairira kwange;
onnunule ngʼobwewasuubizire.
171 Nakuwuujanga bulijo,
olwʼokubba onjegesya amateekago.
172 Nayembanga oku kibonokyo,
olwʼokubba ebiragirobyo byonabyona bituuce.
173 Obbenge mutegeki bulijo okumbeera,
olwʼokubba nalonderewo kukwatanga mateekago.
174 Oo Musengwa, njoya okunnunula,
era amateekago niigo eisangaalo lyange.
175 Ompe obwomi, awo nkuwuujenge,
era oganye amateekago gambeerenge.
176 Mmamaalikire ni nkuzwaku ooti ntaama agotere.
Onnoonieku, nze omuweereryawo,
olwʼokubba tinerabiranga ebiragirobyo.