13
Eeri akubbembera aBembi. EZabbuli ya Dawudi.
Okusaba oKibbumba okutulamya
1 Oo Musengwa, walituuca di okuneerabira? Ni waneerabirira nakimo?
Watuuca di ngʼonkubbira omugongo?
2 Nalituuca di okweyanika omwoyo,
nʼokubba nʼenima omu mwoyo gwange nabuli lunaku?
Omulabe wange yalituuca di okumpangulanga?
3 Oo Musengwa, iwe oKibbumba wange, onningemu era onjiremu.
Onjiryemu amaani, tinaafa,
4 era tiwaganya omulabe wange okukoba ati, “Mmuwangwire,”
nʼabampalana okujaagaana olwa kumpangula.
5 Neye nze neesiga kisaakyo,
najaagaananga olwʼokubba walinnunula.
6 Nakwemberanga Musengwa,
olwʼokubba onkoleire ebisa bingi.