132
EZabbuli ngʼoniinaniina okwaba okusinza omu Yeekaalu.
Enyumba ya Kibbumba entukulye
1 Oo Musengwa, oyebukirye oDawudi
nʼebigosi byonabyona ebiyagumiire.
2 Yakulayiriire, iwe Musengwa,
nʼakola nʼobweyamo egyoli, Iwe oWabwezye, oKibbumba wa Yaakobbo ngʼakoba ati,
3 “Tinalingira omu nyumba yange,
waire okwaba oku buliri,
4 tinaliganya endoolo omumaiso gange,
waire okuwongeraku,
5 paka nga mmalire okusunira oMusengwa ekifo,
nga nsuniire oWabwezye oyo oKibbumba wa Yaakobbo ekifo omu yatyamanga.”
6 Twawuliireku tuti eSanduuku yʼeNdagaano eri mwEfulaasi,
ni tugibonera omu misiri gyʼe Yaali.
7 Ni tukoba tuti, “Oleke twabe omu kifookye omwatyama,
oleke tumuwuujirye awaawuumulirya ebigerebye.
8 Oo Musengwa osetuke, oize omu kifookyo awoowuumulira,
iwe nʼeSanduuku eyʼeNdagaano eyʼobwezyebwo.
9 Oleke abakabonabo bakolenge ebyʼamazima;
oleke abatuukiriryebo baceerenge olwʼeisangaalo.”
10 Oku lwʼomuweereryawo oDawudi,
tiwalekesula oyo oguwasukireku amafuta.
11 OMusengwa yalayiriire oDawudi omu mazima,
nga yeeyama ekyeyamo ekyʼenkalaakalira ekiyatalireka ngʼakoba ati,
“Nalityamisya omoiza okwibyaireryo
oku ntebeyo eyʼobwakabaka.
12 Singa eibyaireryo lyakuumanga endagaano yange,
ni likwatanga nʼebiragiro byange ebimbasomesya,
awo abaana baabwe basikiranga
entebeyo eyʼobwakabaka emirembe gyonagyona.”
13 Ekyo kityo olwʼokubba oMusengwa alondere oSayuuni;
niiye ogwasiimire okubba butyamibwe ngʼakoba ati,
14 “Kinu niikyo ekifo omunawuumuliranga emirembe gyonagyona,
aanu niiwo awenatyamanga oku ntebe eyʼobwakabaka, olwʼokubba nsiimirewo.
15 Naawanga oSayuuni enkabi omu bintu bingi ino,
abadoobi baakyo nabaikutyanga nʼebyokulya.
16 Abakabona baakyo nabawanga enkabi mu buli kimo,
nʼabatuukirirye abakirimu ni baceeranga olwʼeisangaalo.
17 “Aanu wenalisuucira omoiza okwibyaire lya Dawudi okubba kabaka omukulu,
era ni nsuuca ogunasukireku amafuta kitangaala eeri abantu emirembe gyonagyona.
18 Abalabebe nalibaswaza,
neye kwiye enguleye yalimasaamasa.”