149
Olwembo oluwuuja oMusengwa
1 Muwuuje oMusengwa!
Mwembere oMusengwa olwembo oluyaaka,
mumuwuuje omu nkumbaana gyʼabatuukiriryebe.
2 Oleke oIsirairi asangaalire oyo eyamukolere.
Abantu bʼe Sayuuni basangaalire oKabaka waabwe.
3 Muwuuje eriinalye nga mubina,
era mumwembere nga mukubba obugoma nʼotongoli.
4 Ekyo kityo olwʼokubba oMusengwa asiima abantube;
abbeera abawombeeki ni bawangula.
5 Oleke abatya oMusengwa bajaagaane olwʼokuwangula;
bayembe olwʼeisangaalo oku buliri bwabwe.
6 Oleke okuwuuja oKibbumba kubbe omu minwa gyabbwe,
nga bakwaite empiima egyʼobwogi obubiri,
7 okunyaaŋa amawanga,
nʼokubonereza abantu,
8 okusiba abakabaka baabwe nʼenjegere,
nʼabakungu baabwe nʼempingu,
9 okutuukirirya ekibonerezo kyʼomusango ekibabawandiikireku.
Okwo niikwo okwesiima kwʼabatya oMusengwa.
Muwuuje oMusengwa!