148
Ebibbumbe byonabyona biwuuje oKibbumba
1 Muwuuje oMusengwa.
Muwuuje oMusengwa nga musinzirira omwigulu.
Mumuwuuje inywe abali eeyo angulu.
2 Mumuwuuje inywe abamalaikabe nywenanywena,
mumuwuuje inywe amajeege gonagona agʼomwigulu.
3 Mumuwuuje inywe isana nʼomweri;
mumuwuuje inywe enkota gyonagyona egyaka.
4 Omuwuuje iwe igulu eriri angulu ino,
era omuwuuje iwe amaizi agali e ngulu wʼekireri.
5 Oleke biwuuje eriina lya Musengwa,
olwʼokubba yalagiire-bulagiri ni bibbaawo.
6 Yabiteekere omu bifo byabyo bibbeemu emirembe nʼemirembe,
nʼabiteekaku ekiragiro obutazwamu.
7 Inywe abali oku kyalo muwuuje oMusengwa.
Inywe agampiri gʼomu nyanza, na inywe enjabi gya ganyanza,
8 inywe omusyo nʼobbalaafu, nʼobuwolondoki nʼebireri,
omuwuuje iwe ompunga owʼamaani otuukirirya ekiragirokye.
9 Mumuwuuje inywe ensozi nʼobusozi bwonabwona,
emisaale gyʼebineneka nʼemivule gyonagyona,
10 ebisolo ebyʼomu kigona, nʼebyayo byonabyona,
ebibbumbe ebyekuusa okwitakali nʼenyonyi.
11 Inywe abakabaka bʼekyalo nʼamawanga gonagona,
abakungu nʼabafugi nywenanywena abʼoku kyalo,
12 mumuwuuje inywe abaisuka nʼabaala,
abakaire nʼabaana abatobato.
13 Oleke ibo bawuuje eriina lya Musengwa,
olwʼokubba eriinalye lyonkani niiryo eribagulumalya.
Ekitiisyakye kiri angulu ino wʼebintu byʼoku kyalo nʼebyʼomwigulu.
14 Yasuucirye eigwangalye lyʼamaani,
kagira abatuukiriryebe bonabona bamuwuuja,
ibo aBaisirairi, abamuli oku mwoyo.
Muwuuje oMusengwa.