147
Okuwuuja oKibbumba oWabwezye Bwonabwona
1 Muwuuje oMusengwa.
Nga kisa okwemba nga tuwuuja oKibbumba waiswe,
nga kisangaalya era nga kisaanira okumuwuuja!
2 OMusengwa ayombeka obuyaaka oYerusaalemi,
akumbaania aBaisirairi abasuna obwirukiro omu kyalo ekindi.
3 Alamya abanyolere omu myoyo,
era ababudaabuda omu bukosefu byabwe.
4 Niiye asalawo obungi bwʼenkota,
nʼawa nabuli moiza eriina.
5 OMusengwa waiswe mukulu era wʼobwezye obwʼamaani,
nʼamalabukige tigakoma.
6 OMusengwa asetula abebanyooma,
neye afafaagania ababbibabbi.
7 Mwembere oMusengwa nga mumuwuuja,
mwembere oKibbumba waiswe nga mukubba otongoli.
8 Abiika ebireri okwigulu;
ategekera ekyalo oikendi,
era amerya eisubi oku nsozi.
9 Awa ebisolo ekyokulya kyabyo,
nʼawa abaana ba nankololo abakunga ekyokulya.
10 Eisangaalolye tiriri mu mbalaasi endwani,
waire okwenyumirizakwe omu maje agʼoku bigere.
11 Wazira oMusengwa asangaalira baabo abamutya,
abo abateeka eisuubi lyabwe mu kutakakwe okutakoma.
12 Owuuje oMusengwawo, iwe oYerusaalemi;
owuuje oKibbumbawo, iwe oSayuuni,
13 olwʼokubba agumya ebiigaliro byʼamageetigo,
era awa enkabi abantubo abakulimu.
14 Aleeta eidembe oku nsaloyo nʼamawanga agandi
era akuwa ekyokulya ekikira obusa ekikumala.
15 Asindika ekiragirokye oku kyalo;
ekibonokye ni kifuumuuka embiro.
16 Asindika obbalaafu omweru ca ooti byoya bya ntaama omweru,
amansira ekisu ooti ikoke.
17 Asindika amabbaale ga ikendi ooti bubbaalebbaale.
Naani ayezya okugumira obuwolondoki obwasindika?
18 Asindika ekibonokye ni kibisaanuuca.
Asindika ogumpunga, amaizi ni gakulumuka.
19 Abiikulira oYaakobbo ekibonokye,
Amanyikisya aBaisirairi amateekage nʼebiragirobye.
20 Ekyo takikoleranga amawanga agandi;
igo agatamaite ebiragirobye.
Muwuuje oMusengwa.