146
Okuwuuja oMusengwa
1 Muwuuje oMusengwa.
Mwoyo gwange, owuuje oMusengwa.
2 Nawuujanga oMusengwa obwomi bwange bwonabwona;
nayembanga okuwuuja oKibbumba nga nkaali mwomi.
3 Timwesiganga abafugi,
ibo abantu-obuntu abatayezya okununula.
4 Owebafa, bakanga mwitakali;
oku lunaku olunanyere olwo entegeka gyabwe lugifeera.
5 Wʼenkabi iye oyo ngʼoKibbumba wa Yaakobbo niiye obubbeeribwe,
iye oyo ngʼeisuubirye liri mu Musengwa iye oKibbumbawe,
6 iye eyakolere eigulu nʼekyalo,
nʼenyanza nʼebigirimu byonabyona,
iye oMusengwa asigala nga mwesigwa emirembe gyonagyona.
7 Alamula mu bwenkanya abo abebagadya,
era awa abanzalwa ekyokulya.
OMusengwa ateera abasibe,
8 oMusengwa alibulya amaiso gʼaboofu.
OMusengwa airyamu amaani abo abanafuwire;
oMusengwa ataka abatuukirirye.
9 OMusengwa akuuma abasenze,
nʼabbeera abanamwandu nʼabafuubbi,
neye afafaagania ababbibabbi.
10 OMusengwa afuga emirembe gyonagyona.
Iwe Sayuuni, oKibbumbawo afuga emirembe nʼemirembe.
Muwuuje oMusengwa.