145
EZabbuli ya Dawudi eyʼokugulumalya oKibbumba owʼekisa.
1 Nagulumalyanga niiwe oKibbumba era oKabaka wange;
nakuwuujanga emirembe nʼemirembe.
2 Nabuli lunaku nakuwuujanga,
nawuujanga eriinalyo emirembe nʼemirembe.
3 OMusengwa mukulu, era asaaniire okumuwuuja eino,
obukulubwe tibumalikayo.
4 Abʼomulembe ogundi balisiijirya abʼomumulembe ogwiraku ebyakola,
balibalonserya ebyamaani ebyakola.
5 Natumulanga oku kitiisyakye ekibitiriri
nʼokufumintirizanga oku byewunyisya ebyakola.
6 Abantu batumulanga oku maani agʼebyʼentiisya ebyakola,
era nze namanyikisyanga obugulumalibwe.
7 Balangiriranga obusaabwe obubitiriri,
era ni bemba nʼeisangaalo oku butuukiriryebwe.
8 OMusengwa wʼekisa era alumirwa,
alwawo okusunguwala, era aizwire kutaka okutakoma.
9 OMusengwa musa eeri bonabona,
era akwatira ekisa ebyo byonabyona ebiyakolere.
10 Oo Musengwa, ebyomi byonabyona ebiwakolere byakuwuujanga,
nʼabatuukiriryebo bonabona bakuwuujanga.
11 Batumulanga oku kitiisya kyʼobwakabakabwo,
era balonsyanga oku maanigo,
12 okumanyikisya abantu bonabona ebyamaani ebyokola,
nʼekitiisya ekyʼobukulu bwʼobwakabakabwo.
13 Obwakabakabwo bwʼemirembe nʼemirembe,
era obufugibwo bubbeerererawo emirembe gyonagyona.
OMusengwa mwesigwa mu byonabyona ebyasuubiza,
era wʼekisa eeri byonabyona ebiyabbumbire.
14 OMusengwa awanirira abo bonabona abagwa,
nʼairyamu amaani abo abanafuwire.
15 Amaiso gʼebyomi byonabyona galingirira niiwe
era obiwa ebyokulya omu biseera ebituuce.
16 Oyanzululya engaloyo okubigabirira
nʼoikutya nabuli kyomi omu byetaago byakyo.
17 OMusengwa mutuuce mu byonabyona ebyakola,
era wʼekisa omu bikolebye byonabyona.
18 OMusengwa abba kumpi nʼabo bonabona abamusaba,
abo bonabona abamusaba omu mazima.
19 Atuukirirya okwegomba kwabo abamutya,
era awulira okwekunga kwabwe nʼabanunula.
20 OMusengwa akuuma abo bonabona abamutaka,
neye yalijikirica ababbibabbi bonabona.
21 Nze nʼatumulanga ni mpuuja iwe Musengwa,
oleke nabuli ekiri nʼobwomi kikuwuuje emirembe nʼemirembe iwe omutukulye.