144
EZabbuli ya Dawudi.
Okwebalya oMusengwa olwʼobuwanguli
1 OMusengwa bamuwuujenge iye oyo eibbaale lyange omuneebisa,
iye oyo anjegesya okulwana entalo
iye oyo antegeka okulwana.
2 Niiye ali nʼokutaka okutakoma egyendi, era ekikomera kyange ekiwanvu.
Niiye olugaga lwange, era omununuli wange,
niiye engabo yange era egyali ginjirukira okusuna obukuumi,
oyo niiye aica amawanga ansi wange.
3 Oo Musengwa, lwaki olumirwa omuntu-obuntu?
Era omuntu niki-so ekigira nʼomuseegaku?
4 Omuntu abbaawo kaseera-buseera ooti mwota;
enakugye ntono ooti kiiriirye ekigotawo mangu.
5 Oo Musengwa obiikule eigululyo, era oike ansi;
okwate oku nsozi, kaisi giduunye omwosi.
6 Osindike okumesya, era osalaanice abalabebo.
Olase obulasobwo obatiringanisye.
7 Ogolole engaloyo ngʼosinzirira omwigulu;
ontaase era onnunule
okuzwa omu maizi amangi,
okuzwa omu bwezye bwʼabanamawanga,
8 ibo abo abatatumula amazima,
era abalayira nʼebyobubbeyi.
9 Oo Kibbumba, nakwemberanga olwembo oluyaaka;
nakukubbiranga enkana eyʼenkosi eikumi nga wenkwembera.
10 Iwe awa abakabaka obuwanguli,
iwe akuuma omuweereryawo oDawudi eeri empiima eyʼakabbikabbi.
11 Ontaase era onnunule
okuzwa omu bwezye bwʼabanamawanga,
ibo abo abatatumula amazima
era abalayira nʼebyobubbeyi.
12 Oganye abataane baiswe omu mavuvuka gaabwe
bakule nakusani, ooti bimera ebikulire nakusani,
nʼabaala baiswe baboneke nakusani ooti bikondo
ebikulungule owebiwonekesya kusani olubiri.
13 Ebideero byaiswe biizule
nga mulimu amakungula aga buli ngeri.
Entaama gyaiswe gibyalagane ensaiza nʼenkali
omu biriisiryo byaiswe.
14 Oganye ente gyaiswe gibyalagane, nga tigisumula waire okufiisya.
Tiwaabbaawo kuvunia bikomera
nga mpaawo kwaba mu buwambe,
nga mpaawo kukuukulya omu bifo byaiswe.
15 Bʼenkabi abantu abo oKibbumba abaakolera ebintu ebyo;
Bʼenkabi ibo abo ngʼoMusengwa niiye oKibbumba waabwe.