143
EZabbuli ya Dawudi.
Okusaba oMusengwa obubbeeri
1 Oo Musengwa, owulire okusaba kwange,
owulisisye okwegairira kwange,
onjiremu, omu bwesigwabwo era
nʼomu butuukiriryebwo.
2 Tiwansalira nze omuweereryawo omusango,
olwʼokubba mpaawo muntu atuukiriire omumaisogo.
3 Abalabe bange banjiigire,
era bampanguliire nakimo,
ni bandetera okubba omu kifo ekyʼendikiirya,
ni mba ngʼabo abafiire eira.
4 Kale ekyo ni kinzweraku okuwaamu amaani;
omwoyo gwange ni gweraliikirira.
5 Njebukirya ebiseera ebyʼeira,
ni nfumintiriza kwebyo byonabyona ebiwakolere,
ni nseega kwebyo engalogyo ebigyakolere.
6 Nsiirya engalo gyange e gyoli nga nsaba.
Omwoyo gwange gukuli nyonta ooti kyalo ekikalire ekikandiire oikendi.
7 Oo Musengwa, oyanguwe okunjiramu,
amaani gampoiremu.
Tiwaneebityaku, ni mba ooti baadi
abaikirira e magombe.
8 Nabuli makeezi, oneebukiryenge okutakakwo okutakoma,
olwʼokubba neesiga niiwe.
Ondage enzira egindi nʼokukwata,
olwʼokubba neewaayo gyoli mu kusaba.
9 Oo Musengwa, onnunule eeri abalabe bange,
olwʼokubba njirukira giri niiwe okusuna obukuumi.
10 Onjegesye okukola ebyotaka,
olwʼokubba niiwe oKibbumba wange.
Oganye oMwoyowo omusa
annungamye omu mweyaayo.
11 Oo Musengwa, oku lwʼeriinalyo okuume obwomi bwange;
omu butuukiriryebwo, ontaase omu bugosi.
12 Olwʼokutakakwo okutakoma, omalewo abalabe bange,
ojigirice bonabona abanjiigaania,
olwʼokubba ndi muweereryawo.