17
Esaala ya Dawudi.
1 Oo Musengwa, owulisisye okwewozyaku kwange olamule omu bwenkanya.
Owulire okwekunga kwange ombeere.
Otege ekitwi eeri okusaba kwange
okunambulamu bubbeyi.
2 Niiwe obbe olamule ngʼowembulaku omusango,
olwʼokubba niiwe abona ekituuce.
3 Ogezeserye ebiseego byange era nʼokebera nʼomwoyo gwange obwire.
Waneekenenyere era nandi nʼonjajiryamu nsobi.
Ndi mumaliriri okutasobya omu ntumula.
4 Oku bikwata oku bikole byʼabantu, olwʼekibonokyo
neewala amanzira gʼabakola ebikole byʼobukambwe.
5 Bulijo nsengereiryenge biibyo ebiwandagiire,
era tincaamangaku naire.
6 Oo Kibbumba, nkusaba niiwe, olwʼokubba oiramu okusaba kwange.
Ontegere ekitwi, era owulire okusaba kwange.
7 Ondage ekisaakyo omu ngeri eyeewunyisya,
iwe onunula nʼengaloyo endiiro,
abairukira egyoli okubakuuma eeri abalabe baabwe.
8 Onkuume ngʼobwokuuma emunge yʼeriisolyo,
ombise omu kiiriirye kyʼebiyayabyo.
9 Ondamye ababbibabbi abannumba,
era eeri abalabe bange abo abakabbikabbi abanzingiza.
10 Bʼemyoyo miirugazu
era batumula na idumi.
11 Banjiiga nga banzingiza nabuli e gincuukira,
nga banoonia kakisa kʼokunjita.
12 Bali ooti mpologoma aali nzala okunyiiranyiira ekyayiigire,
era bali ooti mpologoma okitobba ayeebisire, ngʼajunjumiriire okukwata ekyayiiga.
13 Oo Musengwa, osetukiremu obalwanisye, era obawangule.
Ondamye ababbibabbi ngʼokolesya empiimayo.
14 Oo Musengwa, ngʼokolesya engaloyo eyʼamaani ondamye abantu abo abʼoku kyalo kunu,
ibo abali nʼomugabo mu bwomi bunu.
Era basune ekibonerezo kyabwe
ekiwabategekeire, abaana baabwe basune ekibamala
nʼabaizukulu bona bakisikire.
15 Neye nze nalibba omumaisogo olwʼokubba tinabbengere omusango.
Era nalyesiima owenaliramukira ni nkubona maiso ku maiso.