16
EZabbuli ya Dawudi.
OKibbumba niiye oguneesiga
1 Oo Kibbumba onkuume,
olwʼokubba njirukira eeri niiwe okunkuuma.
2 Mbutula eeri oMusengwa nti, “Niiwe oMusengwa wange,
ebintu ebisa byonabyona ebindinabyo bizwa eeri niiwe.”
3 Abo abatuukirirye abali oku kyalo,
niibo abakiraku obusa era mwibo niimwo eisangaalo lyange lyonalyona omuliri.
4 Abasinza abakibbumba abandi baabbanga nʼebingi ebibaleyerya.
Tinabeegaitengeku omu kuwaayo esadaaka gyabwe egyʼomusaaye,
era tinasinzenge abakibbumba baabwe.
5 Musengwa, niiwe ongabirira byonabyona.
Era niiwe osalawo ebiri nʼokuntuukaku.
6 Ebyobusika ebyompaire bisa ino,
mazima omugabo gwange musa ino.
7 Nawuujanga oMusengwa oyo annungamya,
nʼobwire omwoyo gwange gunjegesya.
8 Mmaite nti oMusengwa aneekubbembera bulijo,
olwʼokubba ali na nze okumbeera
kaisi tiwaabbaawo ekintukutya omwoyo.
9 Kagira omwoyo gwange gwizwire isangaalo era ni njaagaana,
ntyo ni mba mwidembe.
10 Ekyo kityo olwʼokubba tiwalireka omwoyo gwange e magombe,
waire okuganya omubiri gwʼoMutukulyewo okuvunda.
11 Ondagire enzira yʼobwomi.
Era olwʼokubba oli na nze wanjizulya eisangaalo.
Era nga ndi oku lubba lwʼengaloyo endiiro nʼabba nʼeisangaalo emirembe gyonagyona.