19
Eeri akubbembera abembi. EZabbuli ya Dawudi.
Ekitiisya kya Kibbumba kibonekera mu bibbumbe
1 Eigulu limanyikisya ekitiisya kya Kibbumba,
era nʼebiri omwibbanga biraga ebyemikonobye.
2 Nabuli lunaku lukobera olwiraku;
era nabuli kiire kiranga eeri ekiire ekiiraku ekitiisyakye.
3 Mpaawo ntumula yaabyo ooba kibono kyabyo,
waire eigono lyabyo eribulikikana,
4 ate ngʼeigono eryʼobukwenda lyasaalaine okumalaku ebyalo byonabyona,
nʼebibono byabyo byatuukire nʼomu kisoko kyʼekyalo ekikirirayo nʼakimo obubise.
OKibbumba yakoleire eisana ekifo oku kireri eeyo e giribba.
5 Lizwayo ooti mugole omusaiza omusangaali awulukira omu kisengekye,
era ooti mwiruki owʼamaani ajunjumiriire okutandiika empaka gyʼembiro.
6 Eisana lizwerayo oku lubba olumo olwʼekireri,
era ni lyaba lisalamu paka oku lubba olundi.
Mpaawo ekyebisa eibbugumu lyalyo.
7 Eiteeka lya Musengwa lituukirirye,
liirya omu myoyo gyaiswe amaani.
Ebiragiro bya Musengwa byesigika,
bigeziwalya abula amalabuki.
8 Amateeka ga Musengwa matuuce,
gasangaalya omwoyo.
Ebiragiro bya Musengwa bikengeize,
biigulya omuntu amaiso.
9 Okutya oMusengwa kisa ino,
kibbeerererawo emirembe nʼemirembe.
Okulamula kwa Musengwa kwʼamazima,
era okutwalirya aamo kutuuce.
10 Ebiragirobye byʼomugaso ino okukiraku ezaabbu
era nʼokukiraku iyo ennongoole.
Binyuunyuula okukiraku omujenene,
era nʼokukiraku gudi oguzwa omu bisasala.
11 Era ebiragiro ebyo niibyo ebindabula nze omuweereryawo,
era omu kubikwata mulimu empeera nene.
12 Naani ayezya iye onyere okumanya ensobigye?
Onsoniye ebibbibibbi ebinkola omu butamanya.
13 Onkuume nze omuweereryawo nʼokutakola ebibbibibbi ebigenderere;
tiwabiganya okunfuga.
Awo nʼabba nga mbulaku ekyokunnenya,
era nga mbulaku omusango ogwʼekibbikibbi ekyʼamaani.
14 Nsaba ebibono byange
nʼebiseego byange obisiime.
Musengwa niiwe eibbaale lyange omu neebisa, era niiwe omununuli wange.