20
Eeri akubbembera abembi. EZabbuli Dawudi.
Okusabira okabaka obuwanguli
1 Nsaba oMusengwa airengemu okusabakwo ngʼoli omu bigosi.
Era nsaba oKibbumba wa Yaakobbo akukuumenge.
2 Nsaba akuweereryenge obubbeeri ngʼasinzirira omu Weemaye,
era akujejerenge ngʼasinzirira omu Sayuuni.
3 Nsaba ayebukiryenge ebyowaayo byonabyona,
era aikiriryenge esadaakayo egibooca yonayona.
4 Nsaba akuwenge ebiweegomba,
era atuukiriryenge entegekagyo gyonagyona.
5 Awo twakubbanga olukero olwʼeisangaalo ngʼowangwire,
era twajaagaananga olwʼobuwanguli omu liina lya Kibbumba.
Era nsaba oMusengwa akuwenge byonabyona ebiwamusabanga.
6 Atyanu mmaite ngʼoMusengwa anunula okabaka oyo oguyasukireku amafuta.
Amwiramu ngʼasinzirira omwigululye eritukulye,
era amununula ngʼakolesya engaloye endiiro eyʼamaani amabitiriri.
7 Abamo beesiga bigaali, nʼabandi beesiga mbalaasi,
neye iswe twesige oMusengwa iye oKibbumba waiswe.
8 Abo ibo abeesiga ebyo beesiitaala ni bagwa,
neye iswe tusetuka ni twemerera.
9 Oo Musengwa, onunule okabaka.
Otwirengemu owetwakusabanga okutubbeera.