21
Eeri akubbembera abembi. EZabbuli ya Dawudi.
Okwebalya olwʼobuwanguli
1 Oo Musengwa, okabaka asangaala olwʼokubba omuwa amaani.
Ajaagaana, olwʼokumununula.
2 Omuwaire omwoyogwe ebigwegomba,
era tomwimire ekyakusabire.
3 Era wamusisinkanire nʼomuwa enkabi egyʼamaani,
nʼomuzwalisya oku mutwe engule yʼezaabbu ennongoole.
4 Yakusabire obwomi,
nʼobumuwa nʼawangaala, nʼomuwa nʼobwomi obutawaawo.
5 Ekitiisyakye kinene olwʼobuwanguli obwomuwa,
omuwaire obukulu nʼeitutumo.
6 Dala omuwaire enkabi egyʼenkalaakalira,
era asangaala olwʼokubba oli naye.
7 Okabaka yeesiga oMusengwa.
Era olwʼekisa kyʼoyo oNambulaku aMwagaagana, iye tasagaasagana.
8 Waliwamba abalabebo bonabona,
walikwata abakucaawa.
9 Owewaliboneka,
walibadyaka omu musyo ogwʼamaani eino.
OMusengwa yalibamalirawo nakimo omu bulwabwe,
era omusyo gwalibajigirica.
10 Walijigirica eibyaire lyabwe oku kyalo,
walimalirawo nakimo eibyaire lyabwe oku kyalo.
11 Newankubbaire bateesa okukukolaku akabbikabbi,
era newankubbaire basala enkwe, tibalyezya.
12 Ekyo kityo olwʼokubba walibalasamu obulaso,
ni bacuuka ni bairuka.
13 Oo Musengwa, bakugulumalyenge olwʼamaanigo.
Twayembanga era ni tuwuuja obwezyebwo.