22
Eeri akubbembera abembi. Zabbuli ya Dawudi.
Kibbumba wange tiwandekesula
1 Kibbumba wange, Kibbumba wange, lwaki ondekeswire?
Lwaki omba yala nga nkwekungirira okumbeera?
2 Oo Kibbumba wange, nkwekungirira omusana, neye nandi nʼonjiramu!
Nʼobwire ni nkwekungirira amantawuumula!
3 Niiwe oMutukulye atyama oku ntebe yʼobwakabaka,
niiwe oIsirairi ogwawuuja.
4 Niiwe abazeiza ogubeesiganga.
Bakwesiganga era nʼobanunula.
5 Bakwekungiriranga era nʼobanunula.
Bakwesiganga era nandi nʼobaswaza.
6 Neye ndi kinambulamu ooti igino, era mbulamu akabuntu.
Abantu banjerega era nabuli muntu annyooma.
7 Nabuli moiza ambona nʼansekerera.
Bandoodera minwa, ni batengeetya nʼemitwe nʼobulwa nga bakoba bati:
8 “Yeesiga oMusengwa, aale amulamye.
Abba ngʼoMusengwa amutaka, aale amununule.”
9 Neye niiwe owantoire omu kida kya mama,
wagirire ni nkwesiga nga nkaali nnyonka.
10 Okuzwa olubambyaire, niiwe omulabiriri wange,
era okuzwa ngʼowebambyaire, niiwe oKibbumba wange.
11 Nʼolwekyo tiwamba e yala,
olwʼokubba akabbikabbi kandi kumpi,
era mpaawo eyambeera.
12 Abalabe bangi abaneeruguuliriirye ooti gate aganumi.
Abalabe banzingizire ooti gate aganumi agʼamaani agʼomu kyalo kyʼe Bbasani.
13 Bayasamire ooti mpologoma,
ompologoma aluluma ngʼalulunkanira okunyiiranyiiramu ekyayiigire.
14 Mpoiremu ooti maizi agasusukire,
nʼamagumba gange gonagona galegeya omu nyingo.
Omwoyo gwange guncemuka ooti
dipoli asaanuuka.
15 Amaani gampoire ooti nsaka eyatikire,
nʼolulumi lwange ni lwekwatira oku kiguno kyange.
Ondekere nfe njabe e magombe.
16 Ekiziima kyʼabakola ebibbibibbi
kineeruguuliriirye ooti kiziima kyʼembwa niikyo ekinzingizire.
Engalo gyange nʼebigere byange babisumutyagire.
17 Nsuukire magumba meereere.
Banningirira ni bankaliryaku amaiso.
18 Bagabana ebizwalo byange,
era engoye gyange ni bagikubbiraku akalulu.
19 Neye nkwegairira iwe Musengwa, tiwamba yala.
Iwe amaani gange oyanguwe okumbeera.
20 Onnunule eeri empiima gyʼabalabe bange,
obwomi bwange obwʼomugaso eino obununule eeri embwa egyo.
21 Onnunule eeri amaino gʼempologoma,
wabuliire okwegairira kwange nʼondamya eeri embogo.
22 Namanyikisyanga obukulu bwʼeriinalyo omu boluganda,
era omu nkumbaana gyabwe nakuwuujanga.
23 Inywe omutya oMusengwa mumuwuuje.
Inywe eibyaire lya Yaakobbo nywenanywena, mumugulumalye.
Era inywe eibyaire lya Isirairi nywenanywena, mumuwe ekitiisya.
24 Ekyo kityo olwʼokubba talekesula abanambulaku bubbeeri,
ooba okutafaayo okukugada kwabwe.
Era taleka okubafaaku,
wazira ababbeera owebamukungirira.
25 Nakuwuujanga omu nkumbaana enene.
Natuukiriryanga obweyamo bwange egyoli, omumaiso gʼabo abakutya.
26 Abadoobi baalyanga ni baikuta.
Abo abanoonia oMusengwa bamuwuujanga.
Emyoyo gyabwe gibbenge myomi emirembe nʼemirembe.
27 Abantu omu mawanga gonagona balimanya oMusengwa era baligaluka ni baira egyali.
Ebika byonabyona omu byalo byonabyona byalimusinza.
28 Ekyo kityo olwʼokubba oMusengwa, kabaka
era niiye afuga amawanga gonagona.
29 Oleke abasuni bonabona abʼoku kyalo balye embaga era bamusinze.
Era abo bonabona ababbaawo kaseera-buseera ni bafa, bakotamye emitwe gyabwe omumaisoge.
Niibo abo abatayezya okubba boomi kulwabwe.
30 Abantu abʼomu mulembe ogwiza balimuweererya,
era balikobera abʼomulembe ogwiraku ebikwata oku Musengwa.
31 Abantu abo balikobera abebakaali okubyala, ngʼoKibbumba owaanunula abatuukiriryebe.