28
EZabbuli ya Dawudi.
Esaala yʼobubbeeri
Nkwegairira iwe Musengwa eibbaale lyange omu neebisa.
Tiwagaana okumpulisisya.
Era singa wasirika obusiriki,
nasenja abo abaabire e magombe.
Owulisisye nga nkwekungirira okunkwatira ekisa,
era nga nkusaba okumbeera
nga nsiirirye engalo gyange
ngiringiriirye eKifokyo eKitukulye eIno.
 
Tiwantwalirya aamo nʼabantu ababbibabbi,
era abo abakola ebibbibibbi.
Batumula kusani na bainaabwe,
neye nga omu myoyo gyabwe mulimu nkwe.
Obasasule olwʼebikole byabwe,
era kusinzirira ku bubbibubbi bwʼebikole byabwe.
Obasasule kusinzirira ku biibyo ebibakola,
era obawe ebyo ebibasaanira okusuna.+
Olwʼokubba tibafaayo oku bintu oMusengwa ebyakola,
waire ebyo ebiyakolere nʼengalogye,
yalibijigirica
era tete tiyalibairyawo naire.
 
OMusengwa bamuwuuje,
olwʼokubba awuliire nga mmwekungirira okunkwatira ekisa.
OMusengwa niiye ampa amaani, era niiye engabo yange.
Mmwesiga nʼomwoyo gwange gwonagwona.
Ambeera era omwoyo gwange ni gwizula eisangaalo,
era ni nnyemba okumuwuuja.
 
OMusengwa niiye awa abantube amaani.
Niiye obukuumi era omununuli wʼoyo oguyasukireku amafuta.
Onunule abantubo!
Owe abantubo okububwo enkabi.
Niiwe obbe omulabiriri waabwe,
era ngʼobalera emirembe gyonagyona.
+ 28:4 Bil 22:12