27
EZabbuli ya Dawudi.
Eyeesiga oMusengwa mpaawo ekyatya
1 OMusengwa niiye ekitangaala kyʼobwomi bwange era niiye omununuli wange,
kale mpaawo ogunaatyanga.
OMusengwa niiye olugaga lwange,
kale mpaawo ekyantisyanga.
2 Abantu abakola ebibbibibbi owebaiza okunnumba
nga bataka okummalawo,
abampalana era abalabe bange owebannumba,
beesitaala ni bagwa.
3 Newankubbaire amaje ganzingizanga, omwoyo gwange tigwatyenge.
Waire olutalo owerwansetukirangaku, nasigalanga nga ndi mugumu.
4 Ekintu kimo ekinsaba oMusengwa,
era ekiinnoonia,
kubbanga mu nyumba ya Musengwa enaku gyʼobwomi bwange gyonagyona,
nga nningirira oku busaabwe, era nʼokusaba okulungamyakwe nga ndi omu Yeekaaluye.
5 Ekyo kityo olwʼokubba omu biseera ebigosi
yankuumiranga kusani e gyabba,
era yambisanga omu Yeekaaluye,
nʼanteeka e ngulu okwibbaale eriwanvu.
6 Olwo-so ni nsuna obuwanguli
oku balabe bange abaneeruguuliriirye.
Era ni mpaayo esadaaka omu Weemaye nga nceera olwʼeisangaalo,
era nga nnyemba okuwuuja oMusengwa.
7 Oo Musengwa, owulire okwegairira kwange.
Era onkwatire ekisa, onjiremu.
8 Mpulira omu mwoyo gwange ngʼonkoba oti, “Onnoonie,”
Musengwa, zena njiramu omu mwoyo gwange nti, “Nakunoonianga.”
9 Tiwankubbira omugongo.
Omu busungubwo tiwandekawo nze omuweereryawo.
Niiwe oyabire ngʼombeera.
Kale atyanu tiwandekawo, era tiwandekesula
iwe Kibbumba omununuli wange!
10 Obbaabba nʼomama nʼowebandekawo,
iwe Musengwa ondabirira.
11 Oo Musengwa, ondage enzirayo.
Onnungamye omu nzirayo entuuce,
olwʼokubba ndi nʼabalabe.
12 Tiwampaayo eeri ebyo abalabe bange ebibantakirya.
Ekyo kityo olwʼokubba abansibiriryaku ebyobubbeyi bansetukiireku, era beeyayira okunkola ebizizi.
13 Neye njikirirya nti naabba mwomi,
mbone oku busa bwa Musengwa omu kyalo kyʼaboomi.
14 Nʼolwekyo okuumirire oMusengwa,
obbe mugumu, era oiremu omwoyo.
Dala okuumirire oMusengwa.