26
EZabbuli ya Dawudi.
Okusaba kwʼonambulaku omusango
1 Oo Musengwa, olangirire ngʼowembulaku omusango,
olwʼokubba mpaawo kibbikibbi ekinkolanga,
era neesiga niiwe Musengwa
anambula kubuusabuusa.
2 Onkeme, Musengwa, ongezyesye,
okebere omwoyo gwange nʼenseega yange,
3 olwʼokubba bulijo ekisaakyo niikyo ekineekubbembera,
era ntambulira mu mazimago bulijo.
4 Tinkolagana nʼabantu ababbeyi,
waire kweyimbya nʼabananfunsi.
5 Ncaawa omukumbo gwʼabakola ebibbibibbi,
era tinkolagana nʼababbibabbi.
6 Oo Musengwa, nnaaba omu ngalo okulaga nga mbulaku musango,
kaisi ni nkusinza nga neeruguulya ekyotokyo,
7 nga wembookooka olwembo olwʼokukwebalya
era nga ntumula oku byewunyobyo ebyʼamaani ebyokola.
8 Oo Musengwa, nga ntaka enyumbayo omwobba,
ekifo ekitiisyakyo omukibba.
9 Tiwamalawo obwomi bwange aamo nʼabakola ebibbibibbi,
waire ngʼobwokola abatemo.
10 Ibo abo omu ngalo gyabwe mulimu ntegeka gya bubbibubbi,
era babba mu kulya nguzi bulijo.
11 Neye nze nkola kiidi ekituuce.
Onkwatire ekisa onnunule.
12 E gyendi mpaawo kabbikabbi,
nawuujanga oMusengwa omu nkumbaana enene.