25
EZabbuli ya Dawudi.
Okwegairira oMusengwa
1 Oo Musengwa, neewaayo egyoli.
2 Oo Kibbumba wange, niiwe oguneesiga,
tiwandeka ni nswala, tiwaganya abalabe bange okumpangula.
3 Dala abakwesiga
tiwalibaganya ni baswala,
neye abo abʼenkwe
obaleka ni baswala.
4 Oo Musengwa, ondage amanzirago,
onjegesye okutambulira omu busindebwo.
5 Onnungamye omu mazimago era oganjegesye
olwʼokubba niiwe oKibbumba omununuli wange,
era eisuubi lyange libba mu niiwe okumalaku olunaku.
6 Oo Musengwa, oyebukirye okusaasirakwo nʼekisaakyo,
ebiwalagire okuzwa eira nʼeira.
7 Tiwayebukirya ebikole ebibbibibbi ebyʼomu maisuka gange
waire ebyobujeemu byange.
Neye onjebukirirye mu kutakakwo okwenkalaakalira,
oo Musengwa iwe omusa.
8 OMusengwa musa era mutuuce,
nʼolwekyo alungamya ababbibabbi omu manzirage.
9 Alungamya abawombeeki omu kukola ebintu ebituuce,
era nʼabeegesya okukwata amanzirage.
10 Amanzira ga Musengwa gonagona galimu ekisa nʼobwesigwa,
eeri abo abatuukirirya endagaanoye nʼebiragirobye.
11 Oo Musengwa olwʼeriinalyo,
onsoniye ebibbibibbi byange newankubbaire nga bingi.
12 Muntuki atya oMusengwa?
Oyo niiye oMusengwa oguyalungamyanga omu nzira egyasaaniire okukwata.
13 Omuntu oyo yaabbanga nʼebyobusuni
era eibyairerye lyalisikira ekyalo.
14 OMusengwa abba mukaagwa wʼabo abamutya,
era abamanyikisya endagaanoye.
15 Amaiso gange ngateeka ku Musengwa okumbeera enaku gyonagyona,
olwʼokubba niiye antoola omu kabbikabbi.
16 Oo Musengwa, ondoleku, era onsaasire,
olwʼokubba nsigaire zenkani era ngada.
17 Ebigosi byeyongeire omu mwoyo gwange,
onnunule omu kugada kunu.
18 Obone okugada okwendimu, nʼebigosi byange
era onsoniye ebikole byange ebibbibibbi byonabyona.
19 Obone abalabe bange ngʼowebali abangi,
obone ngʼowebanteekereku ekinakoolo ekyʼamaani.
20 Okuume obwomi bwange era ondamye;
tiwanganya okuswala,
olwʼokubba njirukira eeri niiwe okunkuuma.
21 Obusa bwange nʼamazima gange binkuumenge,
olwʼokubba niiwe oguneesiga.
22 Oo Kibbumba, onunule oIsirairi ibo abantubo
omu bigosi byabwe byonabyona.