30
EZabbuli nʼolwembo. Okuwaayo eYeekaalu. EZabbuli ya Dawudi.
Okwebalya oMusengwa
1 Oo Musengwa, nakugulumalyanga olwʼokubba onnunwire.
Toganyire abalabe bange okwegooŋa oku lwange.
2 Oo Musengwa, iwe oKibbumba wange, nakwekungiriire okumbeera,
era nʼondamya.
3 Oo Musengwa, wankuumire nandi ni nfa,
walamirye obwomi bwange nandi ni njaba e magombe.
4 Inywe abantu ba Musengwa abatuukirirye mumwembere nga mumuwuuja.
Muwuuje eriinalye iye oMutukulye.
5 Obusungubwe bubbaawo kaseera-buseera,
neye ekisaakye kibbeerererawo.
Amaliga gayezya okubbaawo obwire,
neye owebuca eisangaalo ni liiza.
6 Owenabbaire nga ndi omu mirembe nakobere nti,
“Tinaliijulukuka.”
7 Omu kisaakyo, Musengwa,
wannywezere ni mba mugumu ooti lusozi.
Neye owewankubbiire omugongo,
ni mba omu kutya.
8 Nakwekungiriire niiwe Musengwa.
Nakwegairiire niiwe Musengwa okunkwatira ekisa.
9 “Osunamu magobaki owenfa
ni njaba e magombe?
Enkungu giyezya okukuwuuja?
Enkungu egyo giyezya okulaabba ngʼobwoli omwesigwa?
10 Oo Musengwa, ompulisisye, era onkwatire ekisa.
Musengwa, ombeere.”
11 Okunakuwala kwange okunsuuciiryemu mabina agʼeisangaalo.
Ontoireku enima nʼonjizulya eisangaalo.
12 Nʼolwekyo tinasirikenge, era nayembanga okukuwuuja.
Oo Musengwa, iwe oKibbumba wange, nakwebalyanga emirembe gyonagyona.