31
Eeri akubbembera abembi. EZabbuli ya Dawudi.
Okusaba kwʼokwikiririrya omu Kibbumba
1 Oo Musengwa, niiwe ekiirukiro kyange
tiwandekanga ni nswala.
Omu butuukiriryebwo, ombeere era ontaase;
2 ontegere ekitwikyo,
oyanguwe okunnunula.
Obbe niiwe eibbaale lyange omu neebisa,
ekikomera ekiwanvu omumba nandi ni nsuna obugosi.
3 Ngʼobwoli niiwe eibbaale lyange omu neebisa, era olugaga lwange,
olwʼeriinalyo, onnungamye era onkubbembere.
4 Onkuume tinaagwa omu mutego abalabe ogubantegere,
olwʼokubba njirukira giri niiwe okunkuuma.
5 Nkukwatisya omwoyo gwange,
Musengwa onnunule, iwe oKibbumba omwesigwa.
6 Ocaawa abo abaweererya ebifaananyi ebinambulamu mugaso,
neye nze nakwesiga niiwe Musengwa.
7 Nasangaalanga era ni njaagaana olwʼekisaakyo,
olwʼokubba obona okugada kwange,
era omaite enima endi oku mwoyo.
8 Tompaireyo eeri abalabe bange,
neye ompaire eidembe lyʼokutambulira omu kifo kyʼomweyaayo.
9 Oo Musengwa, onkwatire ekisa, olwʼokubba ndi omu bugosi!
Amaiso gange gatangaire olwʼokukunga,
omwoyo gwange nʼomubiri gwange biwoiremu amaani.
10 Obwomi bwange busebengereire olwʼenima,
era emyanka gyange gisalikire olwʼokukenyera.
Mpoiremu amaani olwʼekibbikibbi kyange,
era amagumba gange gagogobere.
11 Abalabe bange bonabona banjolonga era abaliranwa bange,
bambityamu amaiso.
Nʼabakaagwa bange batya okwigerera e gyendi.
Owebansangaana omu nzira banjiruka.
12 Baneerabiire ooti-so nafiire,
nsuukire kitagasa ooti kibya ekyatikire.
13 Mpulira bangi nga bantumulaku ebyakalebule,
era entiisya nʼenkwata.
Abalabe bange bakolera aamo
omu kusala enkwe okunjita.
14 Neye, nze neesiga niiwe Musengwa,
era nkoba nti, “Niiwe oKibbumba wange.”
15 Ekiseera kyʼobwomi bwange kyonakyona kiri mu ngalogyo,
ondamye abalabe bange,
era ondamye abanjiiga.
16 Ololeku omuweereryawo nʼeriiso eryʼekisa,
olwʼekisaakyo onnunule.
17 Oo Musengwa, nkusaba
tiwaganya ni nswala,
Neye oleke ababbibabbi baswale,
Oleke basirinkirire e magombe.
18 Obbuuneku eminwa gyʼababbeyi,
abo abamalala era abʼeidumi
abatumula okubbikubbi oku batuukirirye.
19 Ebisa nga bibitiriri
ebyobisiire abo abakuwa ekitiisya!
Obikolera baabo abairukira egyoli okubakuuma,
okola ekyo abantu bonabona nga babona.
20 Iwe obabisa e gyobba,
nʼobalamya enkwe gyʼabantu.
Obakuumira nakusani eeyo e gyobba,
nʼobalamya ebizumi byʼabalabe baabwe.
21 OMusengwa bamuwuuje,
olwʼokubba yandagire ekisaakye omu ngeri eyeewunyisya,
owebabbaire nga bazingizire ekibuga okunnumba.
22 Natiire ni nkoba nti,
“OMusengwa andekerewo tali aamo nanze!”
Iye yawuliire okwegairira kwange
owenamwekungiriire okumbeera.
23 Mutakenge oMusengwa inywe nywenanywena abatuukiriryebe.
OMusengwa akuuma abo abamwesiga,
neye abʼamalala ababonerezera nakimo ino ngʼowebasaaniire.
24 Mubbe bagumu era mwiremu omwoyo
inywe nywenanywena abali nʼeisuubi omu Musengwa.