32
EZabbuli ya Dawudi.
Okwenenya nʼokusoniya
1 Wʼenkabi iye oyo
oKibbumba ogwasoniyire,
oyo ogwatoireku ebibbibibbibye.
2 Wʼenkabi omuntu oyo
oMusengwa ogwatabalira ekibbikibbi,
era onambulamu obubbeyi.
3 Owenabisabisanga ekikole ekibbikibbi ekinkolere,
nagogobanga
olwʼokukunganga ni mmalaku olunaku.
4 Ekyo kityo olwʼokubba omusana nʼobwire,
wambonerezanga ino,
amaani ni gampweramu nakimo
ooti maizi owegakala omwibbugumu okweisana.
5 Awo ni nkubbutuliranga ebikole byange ebibbibibbi,
era nandi ni njirayo okubisabisanga ebikole byange ebibbibibbi.
Ni nkoba nti, “Oleke mbutulire
oMusengwa ebikole byange ebibbibibbi.”
Era wena nʼonsoniya
omusango gwʼebikole byange ebibbibibbi.
6 Nʼolwekyo oleke nabuli mutuukirirye akwegairirenge
ngʼokaali oyezya okuboneka.
Dala ebigosi ebyʼamaani ooti mataba,
owebyaizanga tibyamutuukengeku.
7 Niiwe ekiirukiro kyange,
ondamya nga ndi omu bigosi
abantu ni babbookooka enyembo olwʼokubba onnunwire.
8 OMusengwa akoba ati, “Nakuleegeranga era ni nkwegesyanga enzira egiwakwatanga.
Nakulungamyanga era ni nkulabiriranga.
9 Timwabbanga basirusiru ooti mbalaasi ooba ooti kisolo onasigirya.
Ibyo bidamba amalabuki,
era babifuga nga babiteekeremu byoma omu minwa nʼemiguwa omu bifubba,
nga tikiikyo tibiigerera e gyoli.”
10 Ababbibabbi nga bagada ino,
neye ekisa kya Musengwa,
kibba eeri iye oyo amwesiga.
11 Musangaale era mujaagaane inywe abatuukirirye, olwʼebyo oMusengwa ebyakola.
Nywenanywena abamugondera muceere olwʼeisangaalo.