33
EZabbuli ya Dawudi.
Okuwuuja oMusengwa
1 Abatuukirirye nywenanywena musangaale olwʼebyo oMusengwa ebyakola,
mumuwuuje inywe abʼemyoyo emirongoole.
2 Muwuuje oMusengwa nga mumukubbira otongoli,
mumwembere oku nkana eyʼenkosi eikumi.
3 Mumwembere olwembo oluyaaka.
Mukubbe ebivuga byanywe nʼamalabuki nʼobukugu, nga muceera olwʼeisangaalo.
4 Ekyo kityo olwʼokubba oMusengwa ebyatumula byʼamazima,
era byonabyona ebyakola byesigwa.
5 Ataka butuukirirye nʼobwenkanya,
era ekisaakye kiizwire ekyalo.
6 OMusengwa yabbumbire eigulu ngʼalagira-bulagiri,
era nʼakola ebiri angulu byonabyona ngʼatumula kibono.
7 Akumbaania amaizi gʼomu nyanza, ni gabba ntuumo.
Amaizi agʼomu nyanza oKibbumba agabisa omu bifo omwagakuumira.
8 Oleke ekyalo kyonakyona kitye oMusengwa,
oleke abantu bonabona abʼoku kyalo bamuwe ekitiisya.
9 Ekyo kityo olwʼokubba yabbumbire ekyalo ngʼatumula-butumuli,
era yalagiire-bulagiri ekyalo ni kibbaawo.
10 OMusengwa amalamu amaani ebiteeso byʼabanamawanga,
akaisya abantu abo ebibategeka okukola.
11 Neye entegeka gya Musengwa gibbeerererawo emirembe nʼemirembe.
Ekyasalawo kibbeerererawo omu bantu bʼemirembe gyonagyona.
12 Lyʼenkabi eigwanga eriri nʼoKibbumba ogulisinza nga niiye oMusengwa,
abantu abo abeyalondere okubba ababe okububwe.
13 OMusengwa asinzirira omwigulu nʼalingirira ansi,
nʼabona abantu bonabona.
14 Asinzirira oku ntebeye eyʼobwakabaka
nʼabona abantu bonabona abali oku kyalo.
15 Iye eyakolere emyoyo gyabwe bonabona,
yeekeenenya ebintu byonabyona ebibakola.
16 Okabaka tawangula olutalo lwakubba ali nʼabʼamaje abangi,
omulwani tawunuka omu lutalo lwakubba ali nʼamaani mangi.
17 Tiweesiga mbalaasi okuwangula olutalo,
nʼowaabba wʼamaani ino, tiniiye anunula omuntu.
18 Neye amaiso ga Musengwa gali ku baabo abamutya.
Era gali ku baabo abali nʼeisuubi omu kisaakye,
19 okubalamya okufa
nʼokubakuuma nga boomi omu biseera byʼenzala.
20 Tukuumirira oMusengwa nga tuli nʼeisuubi mu niiye,
iye atubbeera era engabo yaiswe.
21 Emyoyo gyaiswe gisangaalira mu niiye,
olwʼokubba twesiga liinalye iye omutukulye.
22 Oo Musengwa oganye ekisaakyo kibbe na iswe,
ngʼowetuli nʼeisuubi mu niiwe.