34
EZabbuli ya Dawudi, oweyeesuuciirye ooti mulalu ngʼali omumaiso ga kabaka Abbimereki, atyo okabaka nʼamubbinga era nʼayaba.
Okuwuuja oKibbumba olwʼobusaabwe
1 Nawuujanga oMusengwa bulijo,
omunwa gwange tigwalekerengaawo okumuwuuja.
2 Neenyumiriziranga mu Musengwa,
oleke abali omu kugada bawulire era basangaale.
3 Inywe na nze tugulumalye oMusengwa,
oleke swenaswena aamo tuwuuje eriinalye.
4 Nanoonerye oMusengwa, nʼanjiramu,
era yannunwire mu byonabyona ebyabbaire bintiisya.
5 Ibo abo abamwesiga okubabbeera basangaala,
era tibaliswala kadi.
6 Oyo onambulaku obubbeeri yasabire era oMusengwa nʼamuwulira,
nʼamununula nʼamutoola omu bigosibye byonabyona.
7 Abo abatya oMusengwa, omalaika wa Musengwa abakuuma nga yabeeruguulirirya,
era abanunula.
8 Mumugezesyeku muvumbule ngʼoMusengwa obwali musa!
Wʼenkabi iye oyo airukira egyali.
9 Mutye oMusengwa inywe abatuukiriryebe,
olwʼokubba ibo abo abamutya tibadamba kintu kyonakyona.
10 Empologoma igyo egyʼamaani gikayaku ekyokulya enzala nʼegiruma,
neye abanoonia oMusengwa, tibadamba ekintu ekisa kyonakyona.
11 Mwize inywe abaana bange, mumpulisisye,
nabeegesya okutya oMusengwa.
12 Owoobba otaka okunyumirwa obwomi,
nʼokuwangaala ngʼoli omu bwomi obusa;
13 okuume olulumirwo okutatumula ebintu ebibbibibbi,
nʼomunwagwo okutatumula ebyakalebule.
14 Ozwe omu bikole ebibbibibbi, okolenge biidi ebisa,
olwanikanenge okuleetawo eidembe era lyobbe osengereryenge.
15 Amaiso ga Musengwa gali ku batuukirirye,
era atega amatwige eeri okukunga kwabwe owebamusaba obubbeeri.
16 Neye oMusengwa ayakanisya abo ibo abakola ebibbibibbi,
okubonera nakimo ati abantu oku kyalo tibabeebukirya.
17 OMusengwa awulira abatuukirirye owebamukungirira okubabbeera.
Abanunula omu bigosi byabwe byonabyona.
18 OMusengwa abba kumpi nʼabawoiremu amaani,
anunula abawoireiremu nakimo eisuubi.
19 Omuntu omutuukirirye ayinza okusuna ebigosi bingi,
neye oMusengwa amununula mu byonabyona.
20 Akuumira nakimo omutuukirirye,
amagumbage nandi ni kuvunikaku kadi limo.
21 Ekibbikibbi kyaliita abakola ebibbibibbi,
era abacaawa abatuukirirye balibasingisya omusango.
22 OMusengwa anunula obwomi bwʼabaweereryabe.
Mpaawo kadi moiza kwabo abairukira egyali okubakuuma ogubalisingisya omusango.