35
EZabbuli ya Dawudi.
OMusengwa niiye abbeera abagada
1 Oo Musengwa, oyakane nʼabanjakanisya,
olwane nʼabandwanisya.
2 Okwate engabo enene nʼentono,
osetukiremu ombeere.
3 Otooleyo eisimo nʼomusabbi,
olwanisye abanjiigaania.
Okobe omwoyo gwange oti,
“Ninze omununuliwo.”
4 Oleke abataka okunjita
ensoni gibakwate baswale.
Oleke abateesa okunkolaku akabbikabbi
babakanjirirye e nyuma nga bibasobeire.
5 Obaduumuule ngʼompunga owaafuwa ebisusungu,
era omalaika wa Musengwa ababbingirire.
6 Oleke enzira egibabitamu ekwate endikiirya era ebbe ntyereri,
era omalaika wa Musengwa ababbingirire.
7 Ngʼowebantega emitego gwabwe
anambula nsonga, era ni bakuula ekiina nkigwemu anambula nsonga,
8 oleke okujigirika kubavumbiikirirye.
Era oleke bagwe omu mutego ogubantegere gubapapalye ibo abananyere.
Oleke bagwe omu kiina ekibakwire bajigirike.
9 Awo nasangaaliranga ebyo oMusengwa ebyakola,
najaagaananga olwʼokunnunula.
10 Nʼobwomi bwange bwonabwona nalikoba oMusengwa nti,
“Oo Musengwa, naani aali nga iwe!
Onunula omunafu eeri amukiraku eino amaani,
nʼonunula omudoobi nʼadamba, eeri abamunyagaku ebibye.”
11 Abajulizi abʼobubbeyi basetuka
ni bannumiriza ebintu ebintamaiteku.
12 Obwemba nkola ebisa bansasulamu bibbibibbi,
omwoyo gwange ni gusigala nga munakuwali.
13 Neye ibo owebabbaire nga balwaire, neesibire ebibenga,
ni neewombeka ni nsiiba.
Owetinasunire okunjiramu okusaba kwange,
14 ni mba omu nima oti-so nkunga mukaagwa wange ooba muganda wange.
Ni nkotamya omutwe nga ndi omu nima
ooti-so nkunga mama.
15 Neye nze owenagwire omu bigosi, basangaire,
ni bakumbaana okunduula.
Nʼabentamaite ni bankubba nga tibalekeraawo.
16 Ni banduula ooti bantu abatatya oKibbumba owebakola,
ni bannyayiya.
17 Oo Musengwa, walituuca di okulingirira-obulingiriri?
Ondamye abalabe abannumba.
Onunule obwomi bwange obwʼomugaso eino eeri empologoma egyo.
18 Nakwebaliryanga omu nkumbaana enene.
Nakuwuujiranga omumaiso gʼabantu abangi.
19 Tiwaganya abalabe bange abansibiriryaku okujaagaana olwa kumpangula.
Era abancaawa anambula nsonga, tiwabaganya okwegooŋa nga ndi munakuwali.
20 Tibatumula ebyʼeidembe,
neye bayiiya byʼokusibirirya
ku bantu abʼeidembe oku kyalo.
21 Bannumiriza nga baceera bati, “Ee! Ee!
Tweboneireku nʼagaiswe ngʼakikola!”
22 Oo Musengwa, iwe ebyo obibona, kale tiwasirika.
Musengwa, tiwamba e yala.
23 OSetukiremu era ondwanirire!
Osale omusango gwange iwe oKibbumba wange, era Musengwa wange.
24 Oo Musengwa, iwe oKibbumba wange, ngʼobwoli mutuukirirye olangirire ngʼowembulaku omusango,
era tiwaganya abalabe okwegooŋa oku lwange.
25 Tiwabaganya okukoba omu myoyo gyabwe bati, “Otyo, tusunire ekitubbaire tutaka!”
Ooba okukoba bati, “Oyo tumumalire!”
26 Oleke bonabona abegooŋa olwʼebigosi byange,
ensoni gibakwate baswale era bacankalane.
Era oleke bonabona abaneekudumbaliryaku,
baizule ensoni baswaluke.
27 Oleke abasiima nsinge omusango
baceere olwʼeisangaalo, era bajaagaane.
Era oleke bakobenge bulijo bati, “OMusengwa bamugulumalye,
iye asiima okubona omuweereryawe ngʼawangwire.”
28 Olwo natumulanga oku butuukiriryebwo
era nakuwuujanga okumalaku olunaku.