36
Eeri akubbembera abembi. EZabbuli ya Dawudi.
Ekibbikibbi kyʼomuntu omuweererya wa Musengwa
1 Ekibbikibbi kitumulira omu mwoyo gwʼomuntu omubbimubbi.
Ekyʼokuwa oKibbumba ekitiisya kibabulamu.
2 Ekyo kityo olwʼokubba yeewaana iye onanyere,
nʼaseega ati oKibbumba tiyalibona ekibbikibbikye nʼamunenya.
3 Ebibono ebyatumula bibbibibbi era bya bubbeyi.
Yakomerye okukola ebintu ebyʼamalabuki era ebisa.
4 Nʼowaabba oku buliribwe, afumintiriza kukola bibbibibbi.
Yeekanyangulira mu mpisagye embiibbi,
nandi nʼacaawa ekibbikibbi.
5 Oo Musengwa, ekisaakyo kituuka okwigulu,
obwesigwabwo butuuka oku bireri.
6 Obutuukiriryebwo bubbeerererawo ooti nsozi empanvu,
obwenkanyabwo bwabirira ooti lwabi lwʼenyanza.
Oo Musengwa, olabirira abantu nʼebisolo.
7 Oo Musengwa, ekisaakyo nga kyʼebbeeyi ino!
Abantu bonabona basuna obukuumi
mu kiiriirye kyʼebiyayabyo.
8 Balya ebyokulya ebibitiriri ebyʼomu nyumbayo ni baikuta.
Obawa ebyokunywa ebyesiimisya ebyomusuko ooti mwiga ogukulumuka.
9 Ekyo kityo olwʼokubba niiwe onanzwa wʼobwomi,
era omu kitangaalakyo mutwezyerya okubona ekitangaala.
10 Weeyongere okulaga okutaka okutakoma eeri abo abakumaite,
nʼokukolera abalongoole omu myoyo, ebisa.
11 Tiwaganya abʼamalala okunnumba
waire ababbibabbi okumbinga.
12 Obone, abakola ebibbibibbi owebagwire!
Babakubbyagiirewo era tibayezya okusetuka.