37
EZabbuli ya Dawudi.
Enkomerero eyʼababbibabbi nʼeyʼabasa
1 Tiwaabbanga nʼensaalwa olwʼababibabbi,
waire okugongera olwʼabo abakola ebitali bisa.
2 Ekyo kityo olwʼokubba bawaawo mangu ooti isubi erikala,
era bafa ooti bimera ebikala.
3 Weesigenge oMusengwa era okolenge ebintu ebisa,
olwo waabbanga nʼeidembe oku kyalo.
4 Eisangaalo olinoonienge mu Musengwa,
era yakuwanga ebyo omwoyogwo ebigwegomba.
5 Nabuli kyokola okiwengeyo eeri Musengwa,
omwesigenge, era yakubbeeranga.
6 Yalagisyanga obutuukiriryebwo ni buboneka ooti isana erizwayo,
nʼobwenkanyabwo ni bweraga ooti kasana kʼesaawa omukaaga.
7 OSirinkirirenge omumaiso ga Musengwa, okuumirirenge nʼobuguminkiriza iye ekiyakola.
Tiwafangayo olwʼabakola ebibbibibbi ni babitamu,
era abatuukirirya entegeka gyabwe egyʼokukola obubbibubbi.
8 Tiwasunguwalanga era tiwaabbanga nʼobulwa,
era tiwaabbanga wʼensire. Ebyo bizwamu kukola kibbikibbi.
9 Ekyo kityo olwʼokubba abakola ebibbibibbi balibajigirica.
Neye abeesiga oMusengwa, balisikira ekyalo.
10 Omu kaseera katyai, ababbibabbi balibba bawulawo,
nga nʼobwobanoonia tobabona.
11 Neye ibo abʼeiwooyo balisikira ekyalo,
era balibba mwidembe eribitiriri.
12 Ababbibabbi basala enkwe okukola abatuukirirye akabbikabbi,
era ni babanyayiya.
13 Neye oMusengwa asekerera ababbibabbi abo,
olwʼokubba amaite ati olunaku olwʼokubajigiriciryaku lwiza.
14 Ababbibabbi basowolayo empiima gyabwe,
ni baleega obulaso bwabwe
okwita abadoobi nʼabanambulaku obubbeeri,
nʼokwita abalongoole omu myoyo.
15 Neye ababbibabbi abo, balibaita nga bakolesya empiima gyabwe ginanyereegyo.
Nʼobulaso bwabwe balibuvuna.
16 Ebintu ebitono omutuukirirye ebyabba nabyo,
bikiraku obusuni bwʼababbibabbi abangi.
17 Ekyo kityo olwʼokubba oMusengwa yalimaliramu nakimo ababbibabbi amaani,
neye akuuma abatuukirirye.
18 OMusengwa alabirira abanambulaku ekyokubanenya,
era obusika bwabwe bwalibba bwʼemirembe gyonagyona.
19 Omu biseera ebyʼakabbikabbi tibalibba omu bulumi.
Nʼomu biseera ebyʼenzala, baabbanga nʼebyokulya bingi.
20 Neye ababbibabbi balijigirika.
Abalabe ba Musengwa baliwaawo ooti bimuli byʼomu kigona ebikala.
Baliwaawo ooti mwosi.
21 Ababbibabbi beekoopa nandi ni basasula.
Neye abatuukirirye bagaba nʼomwoyo gumo.
22 Abo oMusengwa abaawa enkabi balisikira ekyalo.
Neye abo abaalaama balijigirika.
23 OMusengwa alungamya omuntu omu nzira entuuce,
era akuuma abo abamusangaalya.
24 Nʼowebeesiitaala tibagwa,
olwʼokubba oMusengwa abakwatirira oku ngalo.
25 Nabbaire mutomuto era atyanu nkairiire,
neye timbonangaku omutuukirirye oMusengwa ogwalekesula,
waire kubona abaanabe nga basabirirya ekyokulya.
26 Bulijo agaba nʼomwoyo gumo, era akoopa abandi,
era abaanabe babba nʼenkabi.
27 Ozwe omu kukola ebibbibibbi, okolenge bikole ebisa,
awo walibba nʼobutyami omu kyalo emirembe nʼemirembe.
28 Ekyo kityo olwʼokubba oMusengwa ataka bwenkanya,
era talekesula abamwesiga.
Abakuuma emirembe gyonagyona.
Neye eibyaire lyʼababbibabbi, balirijigirica.
29 Abatuukirirye balisikira ekyalo,
era ni bakityamamu emirembe gyonagyona.
30 Omuntu omutuukirirye ebimuzwamu bibba byʼamalabuki,
era atumula byobwenkanya.
31 Akwata amateeka ga Kibbumbawe omu mwoyogwe,
era taliiba okugazwaku.
32 Ababbibabbi bagonerera abantu abatuukirirye,
nga banoonia okubaita.
33 Neye oMusengwa tiyaliganya abatuukirirye okugwa omu bwezye bwʼababbibabbi abo,
waire okubaleka ni babasingisya omusango omu kooti.
34 Weesigenge oMusengwa,
era ogonderenge ebiragirobye.
Yalikugulumalya, nʼosikira ekyalo.
Era walibona ababbibabbi nga babajigirica.
35 Naboine omuntu omubbimubbi era omukambwe
nga nabuli kimo kimwabira nakusani ooti musaale ogwamerere omwitakali erijimu.
36 Neye tete owenabitireyo, yabbaire takaali aboneka.
Namunoonerye, neye nga taboneka.
37 Weetegereze omuntu onambulaku ekyokumunenya, era weekenenye omuntu omulongoole omu mwoyo.
Ekyo kityo olwʼokubba enkomerero yʼomuntu oyo gibba mirembe.
38 Neye bonabona abakola ebibbibibbi balibajigirica omulundi gumo,
ababbibabbi balikomenkereza nga bajigirikire.
39 OMusengwa anunula abatuukirirye,
era niiye olugaga lwabwe omu biseera ebyʼebigosi.
40 OMusengwa ababbeera nʼabanunula.
Abanunula okuzwa omwifuge lyʼababbibabbi nʼabalamya,
olwʼokubba bairukira eeri niiye okubakuuma.