38
Okwegairira kwa Dawudi
1 Oo Musengwa, tiwaannenyera omu busungubwo,
waire kumbonerezera omu bulwabwo.
2 Onsumutire nʼobulasobwo,
era nʼonkubba nʼengaloyo ni ngwa.
3 Olwʼobusungubwo mpulira obulumi omu mubiri gwange gwonagwona,
mpulira amagumba gange gameketa olwʼekibbikibbi kyange.
4 Ebibbibibbi byange binzitoowereire,
biri ooti mugugu ogutasetulikika.
5 Amabbwa gange gavundire era gafunya
olwʼobusirusiru bwange.
6 Ndi omu bulumi bungi bungederemu ino,
nsada ngankunga okumalaku olunaku.
7 Omu maniko munjocererya,
mpulira obulumi omu mubiri gwange gwonagwona.
8 Gampoire era ngondagondeire nakimo,
nkenyera olwʼenima egindinayo oku mwoyo.
9 Oo Musengwa, ebineetaaga byonabyona obimaite,
nʼokukenyera kwange okuwulira.
10 Omwoyo gwange gupumpa ino, era amaani gampoiremu.
Amaiso gange gatangaire.
11 Olwʼamabwa gange, abakaagwa bange nʼabaliranwa bange tibaigerera e gyendi,
nʼabaganda bange bamba yala.
12 Abataka okunjita bantega emitego,
abataka okuntucaaku akabbikabbi bateesa okummalawo.
Basiiba kunsalira nkwe.
13 Neye nze ndi ooti masiipe, ooti-so timpulira,
era ooti bbubbu, ooti-so tintumula.
14 Nsuukire ooti masiipe atayezya okuwulira,
era ooti bbubbu atayezya okwiramu.
15 Oo Musengwa, niiwe ogunsuubiriramu,
Musengwa iwe oKibbumba wange, niiwe owanjiramu.
16 Nkusaba tiwaganya abalabe bange okwegooŋa,
waire okujaagaana olwa kumpangula.
17 Nkusaba ntyo olwʼokubba ndi kumpi kugwa,
era ndi omu bulumi obutakoma.
18 Mbutula ebikole byange ebibbibibbi,
era ni nnakuwala ino olwʼebibbibibbi byange.
19 Abalabe bange bali omu bwomi busa era bʼamaani.
Nʼabancaawa anambula nsonga babitiriri.
20 Ibo abenkolera ebisa, bansasulamu bikole bibbibibbi.
Bampalana olwʼokubba ndwanikana okukola ebikole ebisa.
21 Oo Musengwa, tiwandekesula.
Kibbumba wange, tiwamba yala.
22 Oyanguwe okumbeera,
Musengwa niiwe omununuli wange.