39
Eeri akubbembera abembi oYedusuni. EZabbuli ya Dawudi.
Obwomi bwʼomuntu bwʼakaseera katono
1 Nakobere nti, “Neegenderezanga omu mpisa gyange,
era nakuumanga olulumi lwange nandi ni ntumula ebibbibibbi.
Nasirikanga obutabbaaku nʼekintumula
kasita abakola ebibbibibbi babbanga baliwo.”
2 Neye owenasirikire nandi ni nnyega,
era nandi ni ntumulaku waire ku kintu ekisa kyonakyona,
enima yange yeeyongeireku.
3 Omwoyo gwange ni gucemuka.
Eginakomerye okufumintiriza, nʼomwoyo gwange gigwakomerye okucemuukirira.
Okwo kunasinziriire ni nkoba nti,
4 “Musengwa, onkobere entuuco gyʼokufa kwange,
nʼeibbanga erinawangaala.
Ommanyikisye obwomi bwange owebwakomera.”
5 Wakolere obwomi bwange ni bubba bumpi ooti kigalabaayo.
Akaseera akenaliwangaala, mpaawo wekenkana omumaisogo.
Dala obwomi bwa buli muntu bwa kaseera katono ooti mwotagwe ogwayeera,
6 buli ooti kiriirye, tibubba omu kifo ekimo!
Byonabyona ebyakola bimufeera bwereere.
Akumbaania obugaiga nga tamaite eyalibba onanyerebwo.
7 Neye atyanu Musengwa, nsuubire niki?
Eisuubi lyange liri mu niiwe.
8 Onnunule omu bibbibibbi byange byonabyona,
tiwandeka abasirusiru ni bansekerera.
9 Tinatumule, nasirika-busiriki,
olwʼokubba niiwe owatakire otyo.
10 Olekeraawo okumbonereza,
nʼempi egyonkubbire gingonderye.
11 Owobonereza omuntu ngʼomunenya olwʼebibbibibbibye,
ojigirica ebyataka ooti kiwuuka niikyo ekibiriire.
Dala nabuli muntu mwota-woota.
12 Oo Musengwa owulire okusaba kwange,
era owulisisye okwenkunga kwange ombeere.
Tiwaneebityaku nga ndi omu maliga!
Ekyo kityo olwʼokubba ndi musenzewo era munamawanga,
ngʼabazeiza bange bonabona owebabbaire.
13 Ondeke nsangaaleku tete,
nga nkaali okuzwa oku kyalo era nga nkaali okugoterera.