40
Eeri akubbembera abembi. EZabbuli ya Dawudi.
Olwembo lwʼokuwuuja oKibbumba
1 Nakuumiriire nʼokuguminkiriza oMusengwa okumbeera,
yeetegerezere nʼawulira owenamwekungiriire.
2 Yantoire omu kiina ekyʼentiisya,
nʼomwitonsi nʼanjinululya omu lutente,
nʼanjemererya okwibbaale,
ni ntambula nga ndi mugumu.
3 Yampaire olwembo oluyaaka,
olwʼokuwuujanga iye oKibbumba waiswe.
Bangi babonanga ekyo ni batya,
ni beesiganga oMusengwa.
4 Wʼenkabi iye oyo eyeesiga oMusengwa,
era atakola omukumbo nʼabamalala,
waire nʼabasinza ebifaananyi.
5 Oo Musengwa, iwe oKibbumba wange mpaawo akwagaagana.
Ebyewuunyisya bingi ebyonkoleire.
Ebintu ebyotutegekeire
bibitiriri okubibala.
Nʼowengezyaku okubitumulaku,
timpezya nʼokubimalayo!
6 Esadaaka nʼebyo ebibawaayo, tiniibyo omwoyogwo ebigwegombere,
neye wanjigwirye amatwi mpulire.
Esadaaka egibooca yonayona nʼeyo eyʼokusoniya ekikole ekibbikibbi,
tiwabisiimire.
7 Kagira nkoba nti, “Ngonu, ndi aanu, njizire okukola ebyotaka,
ngʼeKiwandiike owekintumulaku.
8 Oo Kibbumba wange, nsangaala okukola ebyotaka,
era nkwata amateekago omu mwoyo gwange.”
9 Omu nkumbaana enene nnangirira ngʼobwotununula.
Tindeka okukitumulaku,
ngʼobwokimaite Musengwa.
10 Timbisabisa omu mwoyo gwange ebikwata oku butuukiriryebwo.
Nnangirira nti oli mwesigwa, era onunula.
Omu nkumbaana enene,
tindeka kubakobera oku kisaakyo nʼobwesigwabwo.
11 Oo Musengwa tiwakomya okunkwatira ekisaakyo.
Ekisaakyo nʼamazimago binkuumenge bulijo.
12 Ekyo kityo olwʼokubba ebigosi ebineeruguuliriirye kibbiiryo, tibibalika.
Njizwire ebibbibibbi bingi, tibikaali binjikirirya okubona.
Bikiraku enziiri egyʼoku mutwe gwange obungi.
Era mpoiremu amaani.
13 Oo Musengwa, oikirirye okunnunula.
Oo Musengwa oyanguwe okumbeera.
14 Oleke abo bonabona abataka okunjita,
baswale era batabuketabuke.
Nʼabo abanoonia okujigirica obwomi bwange,
babakanjirirye nga baswaire.
15 Oleke abo abansekerera,
ensisi ebakwate olwʼokuswala kwabwe.
16 Oleke abo bonabona abakunoonia
bajaagaane era basangaale oku lulwo.
Abo abasiima obununulibwo, bakobenge bulijo bati,
“OMusengwa bamugulumalye.”
17 Neye nze ndi mudoobi era ndamba,
nsaba oMusengwa anseegeku.
Niiwe ombeera era niiwe onnunula.
Oo Kibbumba wange, tiwaalwawo!