41
Eeri akubbembera abembi. EZabbuli ya Dawudi.
OMusengwa niiye abbeera abadoobi
1 Wʼenkabi iye oyo alumirwa abadoobi,
ebigosi owebimutuukaku, oMusengwa amununula.
2 OMusengwa amukuuma nʼamuwa obwomi,
amuwa enkabi omu kyalo,
tamuwaayo omu bwezye bwʼabalabebe.
3 OMusengwa amubbeera nga mulwaire ali oku buliri,
nʼamulamirya nakimo.
4 Nze nkoba nti, “Oo Musengwa nakolere ekikole ekibbikibbi omumaisogo,
onkwatire ekisa era ondamye.”
5 Abalabe bange batumula nga basairirya bati,
“Yalifa di ni bamwerabira?”
6 Befaanania ooti baiza kumbona,
neye omu kubba aawo bannooniaku lugambo,
era owebazwawo baaba ni balusasya.
7 Bonabona abancaawa baweweetanganira ebinfaaku.
Ebikira obubbibubbi bibantakirya.
8 Bakoba bati, “Obulwaire obwalwaire,
tibwakulama, tiyalisetuka oku buliri obwo bbe.”
9 Nʼomukaagwa wange,
oyo oguneesiga eino,
ogundya naye,
ancuukiire.
10 Neye iwe Musengwa, onkwatire ekisa,
onsetule, kaisi njezye okubasasula.
11 Mmaite nti onsiima,
olwʼokubba toganyire abalabe bange okumpangula.
12 Okuumire obwomi bwange olwʼokubba nkola ebituuce.
Onkuumiire omumaisogo emirembe gyonagyona.
13 OMusengwa oyo oKibbumba wa Isirairi bamuwuujenge.
Bamuwuujenge emirembe nʼemirembe.
Amiina era Amiina.