EKITABO EKYOKUBIRI
42
(Zab 42–72)
Eeri akubbembera abembi. EZabbuli yʼabʼeibyaire lya Koola.
Eisuubi lyange liri mu Kibbumba
1 Ngʼokimaadu owaaluga nʼenyonta yʼamaizi,
omwoyo gwange gwona gutyo weguluga okutaka oKibbumba.
2 Omwoyo gwange guyayaanira oKibbumba oyo oKibbumba onanyere obwomi.
Nalyaba di okusinza oKibbumba?
3 Nkunga omusana nʼobwire
era agenkunga gennywa,
neenu ngʼabalabe bange bambuulya okumalaku olunaku bati,
“OKibbumbawo ali yaina?”
4 Omwoyo gwange gwizula enima
oweneebukirya ebyʼeira,
ngʼowenayabanga nʼekiyindi kyʼabantu,
ni nabeekubbemberamu nga twaba omu nyumba ya Kibbumba,
nga tuceera olwʼeisangaalo era tubbookooka okumuwuuja,
omu kiyindi nga tujaguza.
5 Kale atyanu lwaki omwoyo gwange gunakuwala?
Era lwaki omwoyo gwange gweraliikirira?
Oleke eisuubi lyange nditeeke mu Kibbumba,
olwʼokubba nalimuwuuja tete,
Iye omununuli wange era oKibbumba wange.
6 Omwoyo gwange gunakuwaire!
Kagira mmuseegaku nga ndi omu kyalo kyʼe Yoludaani
nʼoku Lusozi oKerumooni
nʼoku Lusozi oMizali.
7 Olwabi lwʼamaizi lweta olwinaye,
olwʼokuyiriitira kwʼamaizigo agawolomboga.
Amaizigo ageedumbya gaika,
nʼamayengogo gonagona ni bimmooma!
8 OMusengwa andaga ekisaakye omusana,
kaisi obwire ni mmwembera,
nga nsaba oKibbumba
oyo ampa obwomi.
9 Nkoba oKibbumba iye eibbaale lyange omu neebisa, nti,
“Lwaki oneerabiire?
Lwaki mbaawo nga nkunga
olwʼabalabe bange okungadya?”
10 Ebizumi byʼabalabe bange bindumirirya
ooti magumba niigo agammeketa.
Basiiba bambuulya bati,
“OKibbumbawo ali yaina?”
11 Kale atyanu lwaki omwoyo gwange gunakuwala?
Era lwaki omwoyo gwange gweraliikirira?
Oleke eisuubi lyange nditeeke mu Kibbumba,
olwʼokubba nalimuwuuja tete,
Iye omununuli wange era oKibbumba wange.