44
Eeri akubbembera abembi. EZabbuli yʼabʼeibyaire lya Koola.
OKibbumba niiye atubbeera bulijo
1 Oo Kibbumba, twewuliriireku nʼagaiswe,
era abazeiza baiswe batulonseirye
ebiwakolere omu mulembe gwabwe,
omu biseera ebyʼeira.
2 Ngʼokolesya obwezyebwo wabbingire abanamawanga,
ekyalo kyabwe nʼokiwa abazeiza baiswe.
Wasasaigwire abantu abanamawanga,
neye abazeiza baiswe nʼobawa eisagaaluko.
3 Abazeiza baiswe tibawangwire ekyalo ekyo nga bakolesya mpiima gyabwe,
era tibasunire obuwanguli nga bakolesya maani gaabwe,
neye gabbaire maanigo nʼobwezyebwo,
era waabbanga nabo olwʼokubba wabbaire obasiima.
4 Niiwe oKabaka wange era oKibbumba wange,
awa oYaakobbo obuwanguli.
5 Okubitira mwiwe tuwangula abalabe baiswe,
omu liinalyo ni twemyagira ansi abatusetukiraku.
6 Tineesiga akalaso kange,
waire empiima yange okundamya.
7 Neye niiwe otununula eeri abalabe baiswe,
nʼoswaza abatucaawa.
8 Twenyumirizanga mu niiwe Kibbumba okumalaku olunaku,
era twawuujanga liinalyo emirembe gyonagyona.
9 Neye atyanu otulekeswire, nʼotuleka ni tuswala,
era tokaali weekubbembera amaje gaiswe omu lutalo.
10 Watulekere abalabe baiswe ni batwiririrya,
era abo abatucaawa ni banyaga nʼebintu byaiswe.
11 Watuwaireyo batwite ooti ntaama egibaaba okusala,
nʼotusalaanicirya omu banamawanga.
12 Watundire abantubo dondolo
era nandi nʼogobamu.
13 Otusuucirye kizumi eeri abaliranwa baiswe,
era ibo abo abatweruguuliriirye batujerega era batunyooma.
14 Otusuucirye majwalo omu banamawanga,
era tuli nseko gyʼabantu abo.
15 Nswaluka okumalaku olunaku,
era njizwire nsoni,
16 olwʼebibono byʼabo abanjolonga, era abanzuma,
nʼolwabalabe nʼabo abanoonia okunyaaŋa.
17 Ebyo byonabyona bitutuukireku
newankubbaire nga titukwerabiire,
waire okumenya endagaano egiwakolere na iswe.
18 Emyoyo gyaiswe tigikuzwangaku,
era titujeemerangaku ebiragirobyo.
19 Neye era watusasaiguliire awali emisege,
nʼotuleka omu ndiikirya awayezya okubba okufa.
20 Singa twerabiire eriina lya Kibbumba waiswe,
ooba ni tusinza okibbumba owʼabanamawanga,
21 ekyo Kibbumba wandikizwire,
olwʼokubba iwe omanya ebyama ebibba omu mwoyo.
22 Neye era nabuli lunaku tubba mu kabbikabbi ka kutwita oku lulwo,
batubona ngʼabasaanira kufa ooti ntaama ogubatwala omu kibbaagiro.
23 Oo Musengwa, olamuke! Lwaki ogona?
Osisimuke, totulekesula emirembe nʼemirembe!
24 Lwaki otukubbira omugongo?
Lwaki tofaayo oku kunyolwa kwaiswe nʼokutugadya?
25 Batudyakire omu nkungu,
ni batumigirirya ansi okwitakali.
26 Osetuke otubbeere,
olwʼekisaakyo otununule.