48
Olwembo. EZabbuli yʼabʼeibyaire lya Koola.
Sayuuni ekibuga kya Kibbumba
1 OMusengwa niiye omukulu era asaaniire okumuwuuja ino,
omu kibuga kya Kibbumba waiswe, oku lusozirwe olutukulye.
2 OSayuuni lusozi oluboneka nakusani omu bugulumali,
isangaalo lyʼekyalo kyonakyona.
Lugulumali ooti lusozi oZafoni,
era oku Sayuuni niikwo okuli ekibuga iye oKabaka oMukulu ekyafuga.
3 OKibbumba ali omu minaala egyʼekibuga ekyo,
yeemanyikisirye nga niiye olugaga lwakyo.
4 Abakabaka bagaitire amaje gaabwe
ni baizira aamo okulumba ekibuga ekyo,
5 neye owebakiboine beewuninkiriire,
ensisi nʼebakwata era ni bakangirira.
6 Ensisi yabakwatiire eeyo,
era ni babba nʼobulumi ngʼobwʼomukali alumwa.
7 Wabajigiricirye ngʼompunga azwa e buzwaisana,
owaajigirica amaato gʼe Talusiisi.
8 Ebitwawuliranga-obuwuliri,
atyanu tubiboine,
omu kibuga kya Kibbumba waiswe,
omu kibuga kya Musengwa oWabwezye Bwonabwona,
ekyakuuma emirembe gyonagyona.
9 Oo Kibbumba, nga tuli omu Yeekaaluyo
tufumintiriza oku kisaakyo.
10 Oo Kibbumba, eriinalyo ngʼobweriri erikulu,
batyo webakuwuuja nabuli wantu oku kyalo.
Ofuga mu bwenkanya.
11 Oleke abantu bʼoku Lusozi oSayuuni basangaale.
Oleke abantu bʼomu bibuga bya Yuda bajaagaane,
olwʼokulamulakwo okwʼobwenkanya.
12 Mutambule mumaleku oSayuuni,
mubale eminaala gyamu.
13 Mwetegereze ebikomera byakyo,
mwetegereze engaga gyakyo,
mwezye okulonserya abʼomulembe ogwaliirawo.
14 OKibbumba oyo niiye oKibbumba waiswe emirembe gyonagyona,
niiye eyatulungamyanga paka owetwalifa.