49
Eeri akubbembera abembi. EZabbuli yʼabʼeibyaire lya Koola.
Obwomi bukira obusuni
1 Muwulisisye kinu abantu nywenanywena.
Mutege amatwi nywenanywena abatyami bʼoku kyalo.
2 Abʼekitiisya nʼababulijo,
abasuni nʼabadoobi.
3 Ekyo kityo olwʼokubba ebibono ebintumula byʼamalabuki,
era ebinfumintiriza omu mwoyo gwange bitegerekeka.
4 Njaba okwetegereza olugero,
nalusonzola nga ndwembera oku tongoli.
5 Lwaki mba nʼokutya omu biseera ebigosi,
ngʼababbibabbi era ababbeyi baneeruguuliriirye?
6 Abo ababbibabbi abeesiga obusuni obubalinabwo,
abeewaana olwʼobungi bwʼebintu byabwe.
7 Mazima mpaawo ayezya okwenunula
ngʼasasula oKibbumba empiiya okumugulya obwomi.
8 Ekyo kityo olwʼokubba kyʼebbeeyi ino okwenunula;
era mpaawo ayezya okusasula egimala,
9 nʼawangaala emirembe gyonagyona,
nandi nʼaingira e magombe.
10 Omuntu yenayena akimaite ati abʼamalabuki bafa;
nʼomu ngeri enanyere eyo abasirusiru nʼabamaayaani bajigirika,
nʼobusuni bwabwe ni babulekera bandi.
11 Amagombe gaabwe niigo ebisito byabwe emirembe gyonagyona,
era gibabba emirembe gyonagyona,
waire nga babbaire nʼeitakali eryabwe-okubwabwe.
12 Omuntu tabbeerererawo lwakubba nti musuni,
yena ajigirika ngʼebisolo.
13 Ekyo niikyo ekituuka kwabo abateeka obwesigwa omu byʼekisirusiru,
niiyo enkomerero yʼabo abeematira nʼobusuni bwabwe.
14 Bali ooti ntaama ogubatwala omu kibbaagiro,
okufa kwalibalya.
Lwalica lumo aBatuukirirye ni bafuga abantu abo;
nʼemibiri gyabwe gyalivunda e magombe,
e yala nʼebisito byabwe.
15 Neye nze oKibbumba yalinunula omwoyo gwange eeri amaani gʼe magombe,
mazima yalinjaniriza.
16 Omuntu nʼowagaigawala
ekitiisyakye ni kyeyongera, tikikwewuninkiriryanga.
17 Ekyo kityo olwʼokubba oweyalifa tiyalyabaku nʼekintu.
Ekitiisyakye tikyalyaba naye.
18 Newankubbaire omu bwomibwe yeebala okubba wʼenkabi,
ni bamuwaana olwʼokubba nakusani,
19 yalyeyimbya kwabo abʼomulembe gwʼabazeizabe,
etibalibonaku kitangaala tete.
20 Omuntu owaabba nʼobusuni ngʼabula okutegeera,
yena ajigirika ngʼebisolo.