50
EZabbuli yʼAsafu.
OKibbumba niiye asala emisango
1 OWabwezye, oKibbumba
oyo oMusengwa atumula, nʼayetesya abantu bonabona oku kyalo,
okuzwa eisana e girizwa paka e girigwa.
2 OKibbumba anekaaneka ngʼasinzirira omu Sayuuni,
ekibuga ekikirira nakimo obusiipoono.
3 OKibbumba waiswe aiza, neye tikasirinkiriri,
omusyo ogulunkuuma gumwekubbembeire,
ompunga owʼamaani yamweruguuliriirye.
4 Ayeta eigulu nʼekyalo
okubona ngʼalamula abantube.
5 “Munkumbaanirye aanu abatukulye bange,
abo abakolere endagaano na nze mu kumpa sadaaka.”
6 Eigulu lirangirira obutuukirirye bwa Kibbumba,
olwʼokubba iye onanyere, mulamuzi.
7 “Abantu bange muwulisisye, era natumula.
Oleke nkulumirize iwe Isirairi,
ninze oKibbumba, oyo oKibbumbawo.
8 Tinkunenya lwa sadaakagyo,
ooba lwʼesadaaka egibooca yonayona egyodeeberera okumpa.
9 Ente enumi egyʼomu biraalobyo
nʼembuli empanya egyʼomu bisibobyo timbitaka.
10 Ekyo kityo olwʼokubba ebisolo byonabyona ebyʼomu bibira, byange,
nʼente egiri oku nsozi enkumi nʼenkumi.
11 Ebinyonyi byonabyona ebyʼoku nsozi,
nabuli kyomi ekiri omu kigona, kyange.
12 Singa mba nzala tinkukobera niiwe,
olwʼokubba ekyalo nʼebintu byonabyona ebirimu byange.
13 Ndya nyama ya nte onumi?
Ooba nnywa musaaye gwʼembuli?
14 Owengeyo eeri oKibbumba esadaaka eyʼokumwebalya,
otuukiriryenge obweyamobwo eeri iye oNambulaku aMwagaagana.
15 Onjetenge ngʼoli omu bigosi,
nakununulanga, era nʼongulumalya.”
16 Neye oKibbumba akoba omubbimubbi ati,
“Lwaki oyemba amateeka gange ngʼekikwate.
Era lwaki otumula oku ndagaano eginakolere na iwe?
17 Iwe ocaawa okukulungamya,
nʼogaana ebinkukoba okukola.
18 Owoobona omwibbi ngʼomuwagira;
okola omukumbo nʼabalendi.
19 Omunwagwo gutumula bibbibibbi,
nʼolulumirwo lwizwire bubbeyi.
20 Osiiba kutumula wundi ku bagandabo,
nʼokucocoomererya baana ba maawo.
21 Ebyo byonabyona obikolere era ni nsirika,
nʼoseega oti ndi nga iwe.
Neye atyanu nkukawuukira,
ni nkulagira kimo omusango.”
22 “Inywe abaneerabira, mwekuume,
nga bbe, nabanyiiranyiiramu nga mpaawo abanunula.
23 Oyo iye aleeta esadaaka eyʼokuneebalya, angulumalya.
Era oyo iye atambula nakusani,
nze oKibbumba nalimununula.”