51
Eeri akubbembera abembi. EZabbuli ya Dawudi. Onabbi Nasani oweyaabire eeri oDawudi, Dawudi ngʼamalire okutwala oBbasusebba nʼokwita oibaaye, oWuliya.
Esaala eyʼokusoniiya
1 Oo Kibbumba, onkwatire ekisa,
okusinzirira oku kutakakwo okutakoma.
Olwʼekisaakyo ekinene,
ontooleku emisango gyange gyonagyona.
2 Onnaabyeku obubbibubbi bwange bwonabwona,
era ontukulye okuzwa omu kikole ekibbikibbi.
3 Ekyo kityo olwʼokubba mmaite nga nabbengere,
ekibbikibbi kyange kinnumiriza bulijo.
4 Niiwe onanyerenyeere ogunabbengereku,
ni nkola ekicaamu omumaisogo.
Nʼolwekyo ooli mutuuce omu byʼotumula,
era olamula mu bwenkanya.
5 Mbaire omu bibbibibbi okuzwa ngʼowebambyaire,
mazima okuzwa ngʼomama oweyasunire ekida kyange.
6 Iiwe osangaalira mazima omu mwoyo gwʼomuntu.
Onsomesya amalabuki omu mwoyo gwange.
7 Ontukulye okuzwa omu kibbikibbi kyange mbe mulongoole,
onnaabye ntukule okukiraku obbalaafu.
8 Oleke mpulire eisangaalo nʼokwesiima.
Oleke njaagaane waire ngʼonvuniankire.
9 Tiwambalira ebikole byange ebibbibibbi,
onsanguleku obubbibubbi bwange bwonabwona.
10 Oo Kibbumba, ombumbiremu omwoyo omulongoole,
onteekemu omwoyo omuyaaka era omwesimbu.
11 Tiwambinga omumaisogo,
era tiwantoolaku oMwoyowo oMutukulye.
12 Onjirirye eisangaalo eryowa aboonunula,
era ompe omwoyo ogukugondera.
13 Awo nʼayegesyanga abatakugondera ebiragirobyo,
kaisi abakola ebibbibibbi bacuukenge ni baira egyoli.
14 Oo Kibbumba onnunule omu musango gwʼokusuka omusaaye,
iwe Kibbumba omununuli wange.
Era awo nayembanga ino oku butuukiriryebwo.
15 Oo Musengwa, oyasamye omunwa gwange,
kaisi njezye okukuwuuja.
16 Iwe tosiima sadaaka, nandibbaire ngikuwa.
Tosiima waire okusiima esadaaka egibooca yonayona.
17 Esadaaka egyosiima niigwo omwoyo ogwenenya.
Omwoyo ogwenenya era ogwikaikana,
Kibbumba tiwagugaanenge.
18 Oo Kibbumba, obbe wʼekisa eeri oSayuuni era omubbeere.
Oyombeke buyaaka ebitempe bya Yerusaalemi,
19 kaisi osangaalire esadaaka egibawaayo omu mwoyo omusa,
nʼesadaaka egibooca yonayona,
kaisi ente enumi bagiweeyo oku kyotokyo.