52
Eeri akubbembera abembi. EZabbuli ya Dawudi, oDowegi oMwedomu oweyaabire nʼakobera oSawulo ati, “ODawudi ayabire omu kisito kyʼAkimereki.”
OKibbumba niiye asala omusango
1 Iwe owʼamaani,
lwaki weepankira omu kibbikibbi?
Ekisa kya Kibbumba kinkuuma okumalaku olunaku.
2 Osala enkwe okujigirica abandi,
ebibonobyo bisala ooti kamweso akoogi,
bulijo oyiiya ebyʼobubbeyi.
3 Osiima obubbibubbi okukiraku obusa,
era nʼobubbeyi okukiraku amazima.
4 Osiima ebibono ebirumya abandi,
mubbeyi iwe!
5 Neye oKibbumba yalikujigirica emirembe gyonagyona.
Yalikwangula omu nyumbayo era nʼakunyiiranyiiramu,
nʼakutoola omu kyalo kyʼaboomi.
6 Abantu abatuukirirye balibona ni batya.
Balikusekerera ni bakoba bati,
7 “Obone oyo
anandi nʼasuuca oKibbumba okubba olugagalwe,
wazira ni yeesiganga busunibwe obubitiriri,
nʼokweyongera mu maani
ngʼajigirica abandi.”
8 Neye nze ndi kusani omu nyumba ya Kibbumba
ooti musaale omuzaituuni ogukula kusani.
Neesiga kisa kya Kibbumba
emirembe nʼemirembe.
9 Nakwebalyanga emirembe gyonagyona,
era nakwesiganga olwʼebyo ebyokolere.
Nabbutulanga omumaiso gʼabatuukiriryebo ngʼobwoli omusa.