58
Eeri akubbembera abembi. Okwigono, “Tiwajigirica.” EZabbuli ya Dawudi.
OKibbumba abonereza ababbibabbi
1 Inywe abafugi, dala muwa ebiragiro mu butuuce?
Abantu mubalamula mu bwenkanya?
2 Kadi, omu myoyo gyanywe museega kukola bibbibibbi,
era mukola byobukambwe oku kyalo.
3 Ababbibabbi bacaama kuzwa ngʼowebababyala,
era bababyala nʼobubbeyi.
4 Ebibono ebibazwamu bya kabbikabbi ooti saagwa wa mpiri,
basyalaire ooti kongomasaka omasiipe,
5 atawulira eigono lya mulogo omukwati wʼempiri,
ooba lya mandwa omukugu.
6 Oo Kibbumba abo abali ooti mpologoma obamulungulemu amaino.
Oo Musengwa obbongolyagemu amaino gaabwe agali ooti gʼempologoma enzira.
7 Oleke baweewo ooti maizi agakulumuka,
era owebatoolangayo obulaso bwabwe okulasa, bubbenge butuntunyiri.
8 Oleke babbe ooti kikovu ekinyeenyeera nga kitambula,
oleke babbe ooti mwana ogubabyaire nga mufu etiyalibonaku eisana.
9 OKibbumba yalibamalawo mangu; abatobato nʼabakulu,
nga nʼensaka egibateekere oku musyo gwʼenkwi egyʼamawa, ekaali okusyoya.
10 Abatuukirirye balijaagaana owebalibona okunyaaŋa okwo.
Balinaaba ebigere byabwe omu musaaye gwʼababbibabbi.
11 Abantu balikoba bati,
“Dala abatuukirirye basuna empeera.
Dala oKibbumba aliwo, iye alamula emisango oku kyalo!”