57
Eeri akubbembera abembi. Okwigono, “Tiwajigirica.” EZabbuli ya Dawudi oweyairukire oSawulo, nʼayaba omu mpuku.
Okusaba oKibbumba okubbeera
1 Onkwatire ekisa Kibbumba wange, onkwatire ekisa
olwʼokubba njirukira eeri niiwe okunkuuma.
Nsuna obukuumi mu kiiriirye kyʼebiyayabyo
paka entalo owegica.
2 Neekungirira Kibbumba oNambulaku aMwagaagana,
oKibbumba oyo atuukirirya ebiyantegekeire.
3 Yalisindika obubbeeri okuzwa omwigulu okunnunula,
yalikaawukira abanjolonga.
OKibbumba yalindaga okutakakwe okutakoma, era yalindaga ngʼobwali omwesigwa.
4 Ndi aakati omu balabe abali ooti mpologoma
egiri amairu okukaavuula abantu.
Amaino gʼabalabe bange gabeesongoirye ooti masimo nʼobulaso.
Endimi gyabwe njogi ooti mpiima.
5 Oo Kibbumba bakugulumalyenge okubitamu eigulu,
oleke ekitiisyakyo kiwoisye ekyalo kyonakyona.
6 Abalabe bange bategere omutego okumpapalya,
ngoogookere omu bigosi ebimpitiriireku!
Bakwire ekiina omu nzira yange,
neye ibo abananyere niibo abakigwiremu.
7 Oo Kibbumba, omwoyo gwange mugumu,
omwoyo gwange mugumu,
nayembanga era ni nkuwuuja.
8 Olamuke iwe mwoyo gwange,
olamuke iwe tongoli era iwe nkana!
Nalamuka ngʼemambya ekaali okusala!
9 Oo Musengwa nakusisiijiryanga omu bantu.
Nayembanga okukuwuuja omu mawanga.
10 Ekyo kityo olwʼokubba okutakakwo okutakoma kugulumali okutuuka kwigulu.
Obwesigwabwo butuuka nʼoku kireri.
11 Oo Kibbumba, bakugulumalyenge okubitamu eigulu,
oleke ekitiisyakyo kiwoisye ekyalo kyonakyona.