56
Eeri akubbembera abembi. EZabbuli ya Dawudi. ABafirisuuti owebamukwatiire omu Gaasi.
Okwesiga oKibbumba
1 Oo Kibbumba onkwatire ekisa, olwʼokubba abantu bannumba.
Okumalaku olunaku lwonalwona, abalabe bange banjiigania.
2 Abalabe bange bannumba okumalaku olunaku lwonalwona.
Omwidumi lyabwe bandwanisya.
3 Neye nabuli owentya,
nteeka obwesigwa bwange mu niiwe.
4 OKibbumba namuwuujanga olwʼebyo ebyasuubiza.
Omu Kibbumba munateekanga obwesigwa bwange, tinaatyenge.
Abantu-obuntu bayezya kunkola niki?
5 Okumalaku olunaku abalabe bange bacuusacuusa ebibono byange.
Basala enkwe bulijo okunkolaku akabbikabbi.
6 Beekumbaania awabise,
ni bakeeta entambula yange
nga bankiiya.
7 Oo Kibbumba, tiwabaganya okuwunuka ekibonerezokyo.
Omu busungubwo, owangule abantu abo.
8 Iwe omaite okunakuwala kwange.
Omaite obungi bwʼamaliga agenjabire nga nkunga.
Timawandiike omu kitabokyo?
9 Olunaku olunalikwekungirira okumbeera, abalabe bange balicuuka ni bakangayo e nyuma.
Olwʼekyo mmaite nga iwe Kibbumba,
oli oku lubba lwange.
10 OKibbumba mmuwuuja olwʼebyo ebyasuubiza.
OMusengwa mmuwuuja olwʼebyo ebyasuubiza.
11 Omu Kibbumba munateekanga obwesigwa bwange, tinaatyenge.
Abantu-obuntu bayezya kunkola niki?
12 Oo Kibbumba, ndi nʼokutuukirirya obweyamo bwange.
Naliwaayo egyoli esadaaka eyʼokwebalya.
13 Ekyo kityo olwʼokubba onnunwire omu kufa,
nʼonunula nʼebigere byange obuteesiitaala,
awo ni ntambulira omumaisogo,
omu kyalo kyʼaboomi.