55
Eeri akubbembera abembi. Egibembera oku bivuga ebyʼenkosi. EZabbuli ya Dawudi.
OMusengwa niiye atulamya abʼenkwe
1 Oo Kibbumba, otege ekitwi eeri okusaba kwange,
tiwagaana okwegairira kwange.
2 Ompulisisye era onjiremu.
Ebigosi bimbitiriireku era ndi mu kwekedenkerera.
3 Okuceera kwa balabe bange,
nʼababbibabbi okunjiigaania, bintiisiriirye.
Ekyo kityo olwʼokubba bankolaku obulabe,
era omu busungu banteekereku endibo.
4 Njizwire obulumi oku mwoyo,
ensisi yʼokufa enkwaite.
5 Ntiire era ntukuta,
ekyekango kingwireku.
6 Era nakobere nti, “Singa mbaire nʼamayaya ooti njiiwa,
nandigulukire ni nnoonia e ginandisuniire eidembe.
7 Nandigulukire ni njaba yala,
ni mba eeyo omwidungu.
8 Nandisunire mangu aweneebbambika,
ni mbawunuka abo abali ooti mpunga owʼamaani era ooti ikendi owʼamabbaale.”
9 Oo Musengwa otabuletabule ababbibabbi, era entumula yaabwe ogigotesyegotesye,
olwʼokubba mbona bikole byʼobukambwe nʼokayaani omu kibuga.
10 Omusana nʼobwire batambula nga beeruguuliirirya ekikomera kyʼekibuga ekyo,
era mwikyo mwizwire bikole ebibbibibbi na mitawaana.
11 Obutemo niibwo obuli omu kibuga ekyo,
okutiisyatiisya nʼobubbeyi tibica omu nguudo gyakyo.
12 Singa omulabe niiye anzuma,
nandikigumiire.
Singa ampalana niiye aneepankiraku,
nandibbaire mmwebisaku.
13 Neye niiwe omunange oguntambula naye,
omuntu owange, omukaagwa wange,
14 ogunnonsyanga naye,
ogutukumbaananga naye omu nyumba ya Kibbumba.
15 Oleke okufa kugwe oku balabe bange kibbwatukira.
Oleke baabe e magombe nga bakaali boomi,
olwʼokubba ekibbikibbi kibba omu bisito byabwe nʼomu myoyo gyabwe.
16 Neye nze nasabanga oKibbumba okumbeera,
era oMusengwa yannunulanga.
17 Eigulo nʼamakeezi nʼomusana
neezulugumanga ni nkuukulya,
nʼawulira eigono lyange.
18 Yalinjirya nakusani
okuzwa omu lutalo olunsetukiireku,
waire ngʼabandwanisya bangi.
19 OKibbumba eyafugire okuzwa eira nʼeira
yampulira nga mmwegairira nʼawangula abalabe abo,
olwʼokubba tibacuuka okuleka ebikole byabwe,
era tibatya oKibbumba.
20 Omuntu owange alumbire abakaagwabe,
nʼamenya endagaano egiyakolere nabo.
21 Ebibonobye byabbaire binyuma okuwulira okukiraku okukomba amakita,
neye nga ekimuli oku mwoyo, lutalo.
Nʼebibonobye byabbaire byogi
ooti mpiima.
22 Ebigosibyo obikwatisyenge Musengwa,
niiye eyakubbeeranga.
Tiyalekenge abatuukirirye, abantu okubawangula.
23 Neye iwe Musengwa,
abantu abo abatemo nʼababbeyi
walibadyaka omu kiina ekitakoma
ngʼemyanka egibandiwangaire bakaali nʼokugituuca aakati.
Neye nze neesiganga niiwe.