99
OKibbumba oyo akira obukulu
1 OMusengwa niiye afuga,
era oleke amawanga gatukute.
Atyaime oku ntebeye eyʼobwakabaka aakati omu bakeruubbi,
era oleke ekyalo kitengeete.
2 OMusengwa niiye akira obukulu omu Sayuuni,
niiye ogubagulumalya omu mawanga gonagona.
3 Oleke bawuuje eriinalye erikulu era eryʼentiisya.
Iye Mutukulye.
4 OKabaka iye owabwezye, ataka bwenkanya.
Wateekerewo enkola yʼokutamomola,
era omwIsirairi okolere
ekyo ekyʼobwenkanya era ekituuce.
5 Mugulumalye oMusengwa iye oKibbumba waiswe!
Era mumusinze nga muli omumaiso gʼentebeye eyʼobwakabaka,
olwʼokubba iye Mutukulye.
6 OMusa nʼAlooni babbaire bamo oku bakabonabe,
nʼoSamwiri yabbaire moiza kwabo
abamwegairiranga.
Beegairiranga oMusengwa era nʼabairangamu.
7 Yatumwire nabo ngʼasinzirira omu kireri ekiterembereri ooti kikondo;
bakwaite amateekage nʼebiragiro ebiyabbaire abawaire.
8 Oo Musengwa, iwe oKibbumba waiswe,
wabairiremu.
Wabalagire ngʼobwoli Kibbumba asoniya,
waire wona nga wababonerezere olwʼebibbibibbi byabwe.
9 Mugulumalye oMusengwa iye oKibbumba waiswe,
era mumusinzire oku lusozirwe olutukulye,
olwʼokubba oMusengwa iye oKibbumba waiswe iye Mutukulye.