98
EZabbuli.
OKibbumba niiye afuga ekyalo
1 Mwembere oMusengwa olwembo oluyaaka,
olwʼokubba akolere ebyewuunyisya;
olwʼobwezyebwe nʼamaanige amabitiriri,
abawanguliire.
2 OMusengwa alagire ngʼobwali omununuli,
era abanamawanga abalagire obutuukiriryebwe.
3 Ayebukiirye okutakakwe okutakoma
nʼobwesigwabwe eeri aBaisirairi.
Abantu omu kyalo kyonakyona baboine
obununuli bwa Kibbumba waiswe.
4 Nywenanywena abʼoku kyalo, mubbookookere oMusengwa olwʼeisangaalo,
mujaagaane nga mwemba okumuwuuja.
5 Mwembe okuwuuja oMusengwa nga mumukubbira otongoli,
mumwembere nʼeigono eriweeweeri nga mukubba otongoli.
6 Era nga mufuwa amakondeere nʼonzobe,
muceere olwʼeisangaalo omumaiso ga Musengwa iye oKabaka.
7 Oleke enyanza ewooge ngʼemuwuuja, nʼebigirimu byonabyona biceere nga bimuwuuja,
ekyalo nʼebikirimu byonabyona bimwembere.
8 Oleke emiiga gikubbe omu ngalo,
nʼensozi gyembere aamo omwisangaalo.
9 Oleke byembere omumaiso ga Musengwa,
olwʼokubba aiza okusalira ekyalo omusango.
Yalikubbembera abantu mu bwenkanya,
era yaliramula abantu nga tiyeekubbira.