97
OKibbumba niiye oMufugi omukulu
1 OMusengwa niiye afuga, oleke ekyalo kisangaale;
oleke abali oku bizinga bonabona bajaagaane.
2 Ebireri nʼondikiirya ozigizigi bimweruguuliriirye;
obutuukirirye nʼobwenkanya niibyo omusingi gwʼentebe yʼobwakabakabwe.
3 Omusyo gumwekubbemberamu,
ni gwoca abalabebe abamweruguliriirye.
4 Okumesyakwe kumoleka ekyalo,
era ekyalo kibona ni kitya.
5 Ensozi omumaiso ga Musengwa gisaanuuka ooti malembo,
gisaanuuka omumaiso ga Musengwa owʼekyalo kyonakyona.
6 Eigulu lirangirira obutuukiriryebwe,
era abantu bonabona ni babona ekitiisyakye.
7 Bonabona abasinza ebifaananyi,
abo abenyumiriza mwebyo ebitali Kibbumba, baswaire.
Abakibbumba bonabona bakotamya emitwe okusinza oMusengwa.
8 Oo Musengwa, abʼomu Sayuuni basangaala,
nʼabʼomu bibuga bya Yuda bajaagaana
olwʼokulamulakwo.
9 Ekyo kityo olwʼokubba iwe Musengwa, niiwe oNambulaku aMwagaagana afuga ekyalo kyonakyona,
era bakugulumalirya nakimo ino okukiraku abakibbumba abandi bonabona.
10 Inywe abataka oMusengwa, mucaawe ekibbikibbi.
Iye akuuma obwomi bwʼabo abamwesiga,
era nʼabanunula omu bwezye bwʼababbibabbi.
11 Ekitangaala kyakira abatuukirirye,
nʼeisangaalo libba eeri abʼemyoyo emirongoole.
12 Inywe abeesiga oMusengwa mujaagaane olwʼebyo ebyakola,
era mumuwuuje iye oMutukulye.