96
OKibbumba Kabaka wa byonabyona
(1Mi 16:23-33)
1 Mwembere oMusengwa olwembo oluyaaka,
abʼoku kyalo nywenanywena mwembere oMusengwa.
2 Mwembere oMusengwa nga muwuuja eriinalye,
nabuli lunaku mulangirirenge ngʼobwali omununuli.
3 Mumanyikisye ekitiisyakye omu mawanga,
nʼebyewunyisya ebyakola omu bantu bonabona.
4 OMusengwa niiye omukulu era asaanira okumuwuuja ino,
bali nʼokumuwa ekitiisya ino okukira ekibawa abakibbumba abandi bonabona.
5 Abakibbumba abandi bonabona abʼabanamawanga bifaananyi byʼokusinza,
neye oMusengwa niiye eyabbumbire eigulu.
6 Ekitiisya nʼobukulu bimweruguuliriirye,
obwezye nʼobusa biri omu Weemaye.
7 Inywe abantu abali oku kyalo muwuuje oMusengwa,
muwuuje ekitiisya kya Musengwa nʼamaanige.
8 Muwe oMusengwa ekitiisya ekyasaanira,
muleete ebyokuwaayo, era mwingire omu luugalwe.
9 Musinze oMusengwa ngʼowaanekaaneka omu butukulyebwe,
abantu bonabona oku kyalo batukute omumaisoge.
10 Mukobere amawanga gonagona muti, “OMusengwa afuga.”
Yateekere ekyalo omu kifo kyakyo, era tikyezya okuyuugayuugana.
Yaliramula abantu mu bwenkanya.
11 Oleke eigulu lijaagaane, nʼekyalo kisangaale,
oleke enyanza ewooge, nʼebigirimu byonabyona biceere nga bimuwuuja.
12 Oleke emisiri nʼebigirimu byonabyona bijaguze.
Emisaale egyʼomu kibira gyonagyona giceere olwʼeisangaalo;
13 gyayembera omumaiso ga Musengwa, olwʼokubba aiza.
Aiza okusalira ekyalo omusango.
Yaliramula ekyalo mu bwenkanya,
yaliramula abantu mu mazima.